Монгол Улсын гавьяат тамирчин, чөлөөт бөхийн дэлхийн аварга шалгаруулах тэмцээний мөнгөн медальт, “Женко” клубийн дасгалжуулагч, МУГТ  Б.Оюунсүрэн Завхан аймгийн Дөрвөлжин суманд мэндэлжээ. Тэрбээр 2008 онд Улаанбаатар хотын 77-р дунд сургуулийг төгсөөд МУБИС-ийн Биеийн тамирийн дээд сургуульд элсэн суралцсан. 2006 оноос "Замчин" спорт клубт  МУГТ, МУГД Т. Сүхбаатарын удирдлага дор чөлөөт бөхөөр хожуу хичээллэж эхэлсэн юм. Харин 2008 оноос "Хангарьд" клубийн тамирчин болсон. 2008 онд залуучуудын УШБ, 2010 онд насанд хүрэгчдийн улсын шигшээ багийн тамирчин болж байлаа.

       Тэрбээр 67 кг-ын  жинд 2010 онд Энэтхэгийн Шинэ Дели хотод болсон Азийн аварга шалгаруулах тэмцээнээс мөнгөн медаль хүртсэн. Улмаар 2011 онд Туркийн Станбул хотод болсон дэлхийн аварга шалгаруулах тэмцээнд Украин, Японы шилдэг бөхчүүдийг дараалан ялж,  Хятадын Ши Лүо Жүо Ма-д дийлдэж, дэлхийн аваргаас мөнгөн медаль хүртсэн манай улсын шилдэг тамирчдын нэг юм.