Олимпын бус жингийн дэлхийн аварга шалгаруулах тэмцээн Албани Улсын Тирана хотноо энэ сарын 28-аас 31-ний өдрүүдэд үргэлжлэн явагдаж өндөрлөнө. ДАШТ-ий эмэгтэйчүүдийн 59 кг-ын жинд өрсөлдсөн "Ташкент-2014” дэлхийн аварга шалгаруулах тэмцээний алт, “Лас- Вегас-2015” дэлхийн аварга шалгаруулах тэмцээний мөнгөн медальт, Үндэсний шигшээ баг, “Алдар” спорт хорооны тамирчин, МУГТ Сүхээгийн Цэрэнчимэд дэлхийн аваргын алтан медалийн төлөө барилдахаар шалгарч үлдээд байна.

      МУГТ С.Цэрэнчимэд эхний тойрогт Мексикийн Ревера Арриагаг 10:0-ээр, хоёрдугаар тойрогт Канадын Борегар Лоренсийг 8:8 -аар ялсан. Наймны нэгд үлдэх шигшээ барилдаанд Азербайжаны Алена Колесникийг 9:0-ийн харьцаатай ялсан. Улмаар дөрөвний нэгийн шигшээ барилдаанд Энэтхэгийн Манси Мансиг 4:1-ийн харьцаатай буулган авч дэлхийн аварга шалгаруулах тэмцээнд арван жилийн дараа дахин финалдаад байгаа. Тэрбээр дэлхийн аваргын алтан медалийн төлөө Японы олимп, дэлхийн аварга Рисока Кавайтай барилдана.

    Чөлөөт бөхийн дэлхийн аварга, Монгол Улсын гавьяат тамирчин, Сүхээгийн Цэрэнчимэд 1995 оны хоёрдугаар сарын 24-ний өдөр  Хэнтий аймгийн Цэнхэрмандал суманд мэндэлжээ. Тэрбээр "Алдар" спорт хорооны МУГТ  Ц.Цогтбаяр, МУГД Ц.Хосбаярын удирдлага дор 2006 оноос эхлэн чөлөөт бөхөөр хичээллэсэн. 

        Гавьяат С.Цэрэнчимэд Узбекистаны Ташкент хотод болсон 2014 оны чөлөөт бөхийн насанд хүрэгчдийн  дэлхийн аварга шалгаруулах тэмцээний 59 кг-ын жинд 19 настайдаа түрүүлж, дэлхийн аварга цол хүртсэн.

        Харин 2015 онд АНУ-ын  Лас Вегас хотод болсон дэлхийн аварга шалгаруулах тэмцээнээс мөнгөн медаль, дэлхийн залуучуудын аварга шалгаруулах тэмцээнээс алтан медаль хүртсэн. Цэргийн дэлхийн аварга шалгаруулах тэмцээний алтан медаль, Иван Яригыны “Алтан гран при” тэмцээнээс алтан медалийг тус тус хүртсэн.  

      Мөн “Монголиа опен” олон улсын тэмцээний гурван удаагийн аварга, Монгол Улсын насанд хүрэгчдийн  дөрвөн удаагийн аварга. Монгол Улсын гавьяат тамирчин билээ.