Дэлхийн бөхийн нэгдсэн холбооны ээлжит конгресс 2024 оны аравдугаар сарын 27-ны өдөр Албани Улсын Тирана хотод амжилттай болж өндөрлөлөө. Энэхүү хуралд нийт 124 орны төлөөлөгчид оролцож Дэлхийн нэгдсэн бөхийн холбооны үйл ажиллагааны тайлан, дүгнэлт болон дүрмийн шинэчилсэн найруулагыг болон бусад асуудлуудыг хэлэлцэж баталсан байна.

       Мөн уг хуралд Монголын чөлөөт бөхийн холбооны ерөнхийлөгч Я.Содбаатар, ЕНБД Б.Мянганбаяр, удирдах зөвлөлийн гишүүд болох С.Энхболд, П.Буяндэлгэр нар оролцож МЧБХ-ны удирдах зөвлөлийн гишүүн Азийн бөхийн холбооны ЕНБД П.Буяндэлгэр дэлхийн бөхийн нэгдсэн холбооны (UWW) гүйцэтгэх зөвлөлд нийт 16 нэр дэвшигчдээс шинээр сонгогдсон долоон гишүүний нэгээр шалгарав.

       Ийнхүү Монгол Улс анх удаа дэлхийн бөхийн нэгдсэн холбооны гүйцэтгэх зөвлөлд гишүүнтэй болсон нь цаашид манай улсын чөлөөт бөхийн ирээдүйн хөгжилд нэгэн цоо шинэ хаалга нээгдэж байгаа юм.