Үндэсний их баяр наадамд дөрөв давсан бөхчүүдээс допингийн шинжилгээ авахад дөрөв нь бүдэрсэн билээ. Одоогийн байдлаар цэргийн арслан Г.Жамбалдорж, аймгийн арслан Г.Хишигбат,  М.Буяндэлгэр нараас допинг илэрч, барилдах эрхийг нь хасаад байгаа.

Харин эргэлзээтэй байгаа хариуны эзэн бол улсын харцага Г.Ганхуяг. Тэрбээр “Тархины цусан хангамж сайжруулах эм уусан. WADA-гийн дүрмээр тухайн элемент 20 мм-ээс дээш бол хэрэглэсэнд тооцдог. Харин 20 мм-ээс доош бол хэрэглээгүй, илрээгүй, шинжилгээний хариу сөрөг гэж үзнэ. Миний шинжилгээний хариугаар 20 мм-ээс доош буюу сөрөг гэж гарсан байна. Цаасан дээр дүрмийн дагуу ингээд бичсэн байна” гэж тухайн үедээ тайлбарлаж байлаа.

Улсын харцага Г.Ганхуягаас хэвийн бус шинжилгээний илэрц тогтоогдсон хариу ирээд байгаа талаар Үндэсний бөхийн салбар хорооны үр дүнгийн хурлаар хэлэлцсэн байдаг. Үүнээс хойш Г.Ганхуяг харцагын талаарх мэдээлэл тасарсан билээ.

Тэгвэл энэ талаар Г.Ганхуяг харцагатай холбогдож тодруулахад “Надад ямар нэгэн байдлаар мэдэгдсэн зүйл алга. Албаныхан тодорхой хариу өгнө байх гэж бодож байна. Допингийн асуудлаар би мэдээлэл өгмөөргүй байна” гэлээ.