Боксыг олимпын хөтөлбөрт үлдээхийн тулд одоогийн Олон улсын боксын холбоо “IBA”-аас тусдаа холбоо байгуулж, ОУОХ-гоор хүлээн зөвшөөрүүлэх ёстой болж байна. Үүний дагуу “World Boxing” хэмээх холбоо байгуулагдаж,” IBA”-ийн гишүүдийг урвуулах ажлыг хийж эхэллээ. Гэвч тэдний хичээл зүтгэл үр дүнд хүрэхгүй, одоогоор 40 гаруй улс шинэ холбоонд элсээд байгаа юм. Нөхцөл байдал нэгэнт иймдээ хүрсэн тул ОУОХ хөндлөнгөөс оролцохоор шийджээ.

        “Indide The Games”-ийн мэдээлснээр ОУОХ-оос Үндэсний олимпын хороодод хандаж, “IBA”-д харьяалагддаг боксын холбоодтойгоо харилцаагаа таслахыг даалгасан байна. Есдүгээр сарын 30-д илгээсэн уг захидалд хэрэв тухайн улсуудын боксын холбоо нь “IBA”-д бүртгэлтэй хэвээр байх аваас боксыг олимпын хөтөлбөрт үлдээх асуудал улам хүндэрнэ гэдгийг анхааруулсан байна.

         Хэрэв боксыг олимпын хөтөлбөрт үлдээхийг хүсэж байгаа бол шинэ, найдвартай удирдах байгууллагатай болох нь чухал гэдгийг онцолж, шинээр байгуулагдсан “World Boxing” холбоонд нэгдэхийг уриалжээ. 2025 оны гуравдугаар сард Грек Улсад болох ОУОХ-ны ээлжит чуулганаар “Лос Анжелес 2028” олимпын хөтөлбөрийг эцэслэн батлах ёстой.

          Үүнээс өмнө ОУОХ-нд хүлээн зөвшөөрөгдсөн, олон гишүүнийг эгнээндээ нэгтгэсэн хүчирхэг олон улсын холбоо байх ёстой.Харин бодит байдал дээр гишүүн орнууд “World Boxing”-д нэгдэхийг яарахгүй байгаа тул ОУОХ-ноос ийнхүү шахалт үзүүлж эхэлсэн бололтой.