Жүдо бөхийн Монгол Улсын гавьяат дасгалжуулагч Шархүүгийн Цэвэлмаа багш 1976 оны энэ өдөр мэндэлжээ. Түүний “Женко” клубийн олон шавь, олон улс тив дэлхий, олимпын дэвжээнээ амжилттай сайн барилдаж эх орныхоо төрийн дууллыг эгшиглүүлж байгаа.  Ш.Цэвэлмаа багш Монгол Улсад самбо, жүдо бөхийг дэлгэрүүлэгчдийн нэг “Монголын жүдо бөхийн загалмайлсан эцэг” хэмээх нэрлэгддэг Монгол Улсын гавьяат дасгалжуулагч Ч.Машбат агсны шавь билээ.

       Ш.Цэвэлмаа багшийг монголд төдийгүй, дэлхий дахинд андахгүй танина. Түүний шавь нараас дэлхийн аварга, олимпын хүрэл медальт, Хөдөлмөрийн баатар, гавьяат тамирчин М.Уранцэцэг, дэлхийн аваргын хүрэл медальт, гавьяат тамирчин Б.Одончимэг, дэлхийн аваргын хүрэл медальт, Монгол Улсын гавьяат тамирчин Б.Мөнгөнчимэг, Ази тивийн хошой аварга, ОУХМ П.Лхамдэгд, Ази тивийн аварга ОУХМ Ц.Наранжаргал, Азийн наадмын аварга, ОУХМ Г.Наранчимэг гээд тив, дэлхийд нэр алдартай тамирчид төрөн гарсан билээ.  Тийм ч ураас түүнийг “Жүдочин охидын оддын ээж” хэмээн ярих нь бий.