Энэ 2024 онд Монгол Улс чөлөөт бөхийн төрөлд анхны дэлхийн аваргатай болсон түүхт 50 жилийн ой тохиож байгаа жил юм. 1974 оны намар Турк Улсын Истанбул хотод зохиогдсон чөлөөт бөхийн дэлхийн аварга шалгаруулах тэмцээнд манай улсын бөх З.Ойдов 62 кг-ын жинд аваргын алтан медалийн төлөө Болгар Улсын бөх Дончо Зековыг ялж эх орныхоо алтан соёмбот далбаа төрийн дууллаа эгшиглүүлэн Монгол Улсын анхны дэлхийн аварга хэмээх эрхэм хүндтэй алдрын эзэн болсон билээ. Энэхүү гайхалтай түүхэн амжилтыг нь дурсан МЧБХ-ны ерөнхий нарийн бичгийн дарга Б.Мянганбаяр хүндэтгэл үзүүлж З.Ойдов аваргадаа дэлхийн алдарт "Nike" брэндийн хувцас чөлөөт бөхийн өмсгөл болон гутлыг дурсгал болгон гардуулав.