"Токио-2020” олимпын хүрэл медальт, Ташкент 2022 жүдо бөхийн ДАШТ-ий алтан медальт ОУХМ Цэнд-Очирын Цогтбаатарт Монгол Улсын Гавьяат тамирчин цол, тэмдгээ гардан авлаа.  Тэрбээр жүдо бөхийн спортоор 15 жил хичээллэхдээ олимп, дэлхийн аварга, гранд слам, гран при ангиллын тэмцээнүүдэд амжилттай оролцон 12 хүрэл, таван мөнгө, зургаан алтан медаль хүртэж байв.

      Мөн түүнчлэн өсвөр үеийн дэлхийн аварга, залуучуудын дэлхийн аваргын хошой мөнгөн медаль, насанд хүрэгчдийн дэлхийн аварга болсон Монгол Улсын тамирчин юм. Түүний  “Токио-2020” зуны олимпын их наадмаас хүрэл медаль, 2022 оны насанд хүрэгчдийн дэлхийн аварга шалгаруулах тэмцээнээс алтан медалийг хүртэж эх орныхоо нэр алдрыг өндөрт өргөсөн хөдөлмөр зүтгэл, жүдо бөхийн спортын хөгжилд оруулсан бодит хувь нэмрийг нь өндрөөр үнэлэн МУГТ цолоор шагнав.