Бидний ярьж, харж заншсан нөгөө л нэг билэг танхай яруу найрагчийн тухай ойлголт хэдий нь өөрчлөгдсөн. Мэдлэгтэй, мэдрэмжтэй, цаг үеэ мэдэрсэн шүлэг, яруу найргийг уншигчид хүсэх болсон цоо шинэ эрин үед бид амьдарч байна. Үүнд нийцэх яруу найрагч хуруу дарам цөөн. Энэ цаг үеийн өөрчлөлт дунд яруу найрагчийн харизм, бичлэгийн өвөрмөц хэлбэрээрээ Г.Хашбаатар манай уншигчдад хэдий нь танил болсон. Түүний шүлгийг харж, номыг нь уншиж дуусахад нэгэн цул хөндүүр бодолд юүлээд сарниж өгөхгүй буглачихдаг юм. Хүлээн зөвшөөрөгдөнө гэдэг гагцхүү цаг хугацааны хэмжүүр биш уран бүтээлийн чанар гэдгийг үүнээс харж болох. Энэ бүхнийг үл нуршин намтар, уран бүтээлийн он цагийг нь ч алгасаж "Бохир гоо зүй" ёгтлол, егөөдлийн шүлгүүд номыг дэлгэцгээе. Эдгээр шүлгүүд уншигч таныг энэ сарын 18-нд болох тус номын нээлт рүү хөтлөх биз ээ.

ЁС СУРТАХУУНЫ ЕГӨӨ БҮЛЭГ ШҮЛЭГ

АРВАН ТАВ.

ХУУЧНЫ ДУУ СОНСООД ШИЛЭН БАРИЛГЫН ӨМНҮҮР АЛХАХАД...

Энэ ямар

Нацагдоржтой төстэй цонх вэ?

Учиртай гурван энэ шилний алинаас нь

Уйлж суугаа

Пагамдулам хага үсрэх бол...

Эмзэг

Харанхуйд-Хад адил цуураад

Их гэрлийн хөлд унана гэхээс

айж байгаа даа

Урт гаанс бөгтийсэн хүрээний гудам мурийжээ

Учраа олоогүй миний урам зоригийг мөхөөжээ

Инээд, хөөрлөөр үлээсэн том цагаан бөмбөлгийг

Эдгээр цонхны нэгээр нь хэн нэгэн унагаажээ.

Энэ ямар

Нацагдоржийн малгай шиг хүүхэн бэ?

Өмсөөд алхсан нэгнээс

Өмөөрч үлдэх юу гүй

Хоосон ийм малгайгаар

Өнөөдөр

Энэ

Хот

Хошин жүжиг тавих юм гэнэ.

АРВАН ДОЛОО.

ГАЛЧ БОЛГОН ЦОЙ БИШ

“Кино”-г сонсож, Цойд дурлаа гээд

Хэн чинь уурын зуухны

Хүрзэнд эвэршсэн гараараа

Хөлсөө шударч үзэв дээ

Үнс наалдсан духанд

Сүнс ч тоож наалдааргүй

Үгүй дээ ч бас л

Үхэж болохоор газар шүү

Хэдэн навч хатааж,

өөрийгөө дотор нь шахаад

Хэн бүхэн өнөөдөр

Галч болохгүй л дээ

ДААНЧ...

***

ХОРИН ДӨРӨВ

ХОРЖООНТОЙ АМЬДРАЛЫН ЭЛЕГИЯ

Ургацийн ихэнхээ царцаан нүүдлээр алдаад

Урвайж явахад хоржоонтойгоор бороо орно

Борооноор зурамны үүр бараадах

Бах мэлхийдийн үсэргээн

Хэцүү цагт хаяад явсан

Хэн нэгний эцгийг сануулна.

Хоосон тариан талбайг дэмий л тойрох уу

Холгуулж холгуулж дассан гутлын өсгийгөө шигтгээд

Хонхор болсон хэсэгт нь нулимсаа тогтоож үзэх үү

Царцаахайсд хэзээ ч бүү гомд

Цаг хугацаа л хамгийн хорон нүүдэлчин

Хуучин тариан түрүүгээр сүлжиж нэхсэн

Хуурамч хааны сүрлэн титмийг

Хүзүүвч болгосон жижиг нохой л

Хажууд архирахын доог тохууг яалтай

Дурсахын ихэнхээ

цаг хугацааны нүүдлээр алдаад

Дуулах дуугүй явахад хоржоонтойгоор

ахиад л бороо орно.

НИЙГЭМ ХАМГААЛЛЫН ТУХАЙ ЁГТ БҮЛЭГ ШҮЛЭГ

ХҮҮХНҮҮД БАРАА ЗАРАХААС ӨӨРИЙГӨӨ ЗАРАХ НЬ ИЛҮҮ АШИГТАЙ ХЭМЭЭХ

ФЕМИНИСТ ШҮЛЭГ...

Явган хүний замаар хоёр эмэгтэй

Өөд өөдөөсөө алхана

Хэн нь мөрөө буцаах бол гэтэл

Духаараа мөргөлдөв.

Будаг нь арилсан духаа гараараа даран

Бие бие рүүгээ худлаа инээмээр аядаад зөрөх гэхдээ ахин мөргөлдөв

Мурийсан хамраа алгаараа дараад

"Муу П" гэж нэг нэгнээ хараагаад

Алдсан цүнхээ нэг нь шүүрэн авч

Нөгөө нь сугарсан гутлаа углан босов.

Өөд өөдөөсөө муухай харж хэсэг зогсоод

Урагш огцом хөдлөхдөө бүүр ч чанга мөргөлдөв

Хоёул хэсэг зуур ухаан алдаад гэнэт сэрээд

Хэн хэнийх нь үүдэн шүд унасныг харав

Явган замыг мөлхөн тэмтэрч шүдээ хайхдаа

Яагаад ч юм мөргөлдсөөр л байлаа тэр хоёр.

XIII

ДӨРӨВ. ЯПОН ШҮЛЭГ

Сарыг үүрч явсан 

Зэнгийн багш 

Чулуун Будда болов

Хэдэрч асан гэрэл нь

Хэн бүхний өлмийд асна.

Хүнгүй агуйн хүйтэн хананд

Хонх, дамар нь

Хоосон чанарын цуурайг орлоно

Мэлхийд тэртээ алсад 

Мэхийн ёслоно.

Чулуун Буддагийн

Тариа хурааж үзээгүй

Танхил алганд

Сарны жимс ургана.

XXVI

PSYCHO

“Бидэнд хэрэггүй зүйлсийг жагсаан бичлээ

Чи бид хоёр шиг биесдээ хэрэггүй юм

Чивэлт орчлонд даанч алга даа” гэх мэтийн

Хуурмаг үгсээр шүлэг бичигчдийн

Хурууг нэг нэгээр сүх дэх хэрэгтэй

Үзэмж гоо, тасарсан хуруудыг

Үрсэлүүлэн ургуулвал

Хүнд хэрэгтэй

Хүнс болж мэднэ шүү.

Арьсан буйдан налуулсан

Суга таяг шиг шүлгээ

Аажмаар хөлд орж

Босож зогсохыг нь харах сан.