Урин хаврын дулаан өдрүүд айлчлан ирж байна. Хорвоо дэлхий өнгө сэлгэж, сайхан бүхэн дэлгэрдэг хаврын улиралд хүмүүсийн хувцаслалт ч нэг тод өнгө нь болдог билээ. Загварын  чиг хандлага өдрөөс өдөрт өөрчлөгдөж буй энэ цагт загварлаг, дэгжин хувцаслахаар зорьж буй танд 2025 оны хавар, зуны тренд загваруудыг танилцуулж байна

ТРЕНД ӨНГӨ: МОКА БОР, ДАРСНЫ УЛААН, ПАСТЕЛ ЗӨӨЛӨН ЯГААН

Mocha Mousse: 2025 оны гол өнгө болох шоколад болон кофены өнгөтэй төстэй зөөлөн өнгө юм. Энэхүү зөөлөн бор өнгө нь сэтгэлд дулаан, тайван мэдрэмж төрүүлнэ.

Романтик ягаан, гүн улаан, тод хөх, саарал ногоон: Эдгээр өнгө нь хамиллаг (хоёр буюу түүнээс дээш өнгийг бүрдүүлэх) загварын трендээр илэрч, хувцаслалтыг өвөрмөц болгож, хувцаслалтад шинэ сэтгэлгээ өгөх юм.

ТРЕНД ХУВЦАС: САВХИН ХҮРЭМ, ЦАГААН СҮЛЖМЭЛ ДААШИНЗ, СУЛ ЮБКА

Дэгжин спорт загвар (Elevated Athleisure):  Энэхүү загварын чиг хандлага нь загварын ертөнцөд чухал байр суурийг эзэлж байна. Арьсан, хилэн, торгон зэрэг өндөр чанартай материалуудыг ашиглан, спорт хэв маягийг илүү дэгжин болгож байна. Жишээл нь, “Tory Burch” брэнд 2025  оны хаврын цуглуулгад гялалзсан загвартай боди, хөл бөмбөгийн цамцан даашинз, илгэн өмд зэрэг загваруудыг танилцуулсан байна.

Далайн эргийн загвар (Coastal Cool): Далайн эргийн тайван амар амгалан уур амьсгалаас сэдэвлэсэн энэ загвар нь хөнгөн, агаар нэвтрүүлдэг, зөөлөн өнгөтэй энгийн, цэвэрхэн харагдуулдаг. Өргөн өмд, сул загвартай цамц, босоо болон хөндлөн судлууд, хагас задгай товчтой сул цамц, шорт, урт сул даашинз зэрэг багтана. Энэхүү стиль нь далайн эрэг дээр амарч буй мэт хөнгөн, эрх чөлөөтэй, гэхдээ цэмцгэр төрхийг бий болгодог. “Quiet luxury” чиг хандлагатай төстэй бөгөөд хэрэглэхэд амар, өндөр чанартай материалаар бүтээгдсэн хувцаснууд зонхилдог.

Нэхмэл, сүлжмэл хувцас: Дулаахан өдөр цагаан даашинз өмсөх нь хавар ирснийг илтгэх зүйлсийн нэг билээ. Тэгвэл энэ хавар таны хувцасны сонголтод цагаан нэхмэл болон хатгамал даашинз багтах нь ээ.

Мото бохо загвар:  Энэ жилийн онцлох чиг хандлага бол мотоциклийн зоригтой элементүүдтэй хослуулсан "мото бохо" юм. Энэ загвар нь савхин хүрэм, мото гутал, том савхин цүнхтэй хослуулан чөлөөтэй хөдөлдөг юбка, нэвт харагдах материалтай, романтик загварын хослол юм.

Амьтны хээтэй хувцас: 2025 онд амьтны хээтэй загварууд дахин хүчээ авч, загварын ертөнцөд онцгой байр суурь эзэлж байна. Тухайлбал, ирвэс, тахь, могойн арьс, толботой хувцас болон гоёл чимэглэлүүд нь өдөр тутмын хувцаслалтдаа ашиглаж болно.

ТРЕНД ГОЁЛ ЧИМЭГЛЭЛ: АЛТЛАГ ГОЁЛ, ТУУЗАН ҮСНИЙ БООЛТ, ЦҮНХНИЙ ЧИМЭГЛЭЛ

Цүнхний гоёл: Цүнхний гоёл болон жижиг чимэглэлүүд нь хувцаслалтад чухал элемент болж, хувийн хэв маягийг илэрхийлэхэд нэмэлт хүч өгч байна. Арьсан, сувдан, болор шигтгээтэй, алтлаг эсвэл мөнгөлөг детальтай чимэглэлүүд түгээмэл болох аж. Мөн Louis Vuitton, Chanel, Dior зэрэг брэндүүдийн таних тэмдэг бүхий гоёл тренд болж байна.

2025 оны загвар нь өнгө, материал, хэв маягийн олон төрлийг нэгтгэж, хүн бүрийн хувийн хэв маягийг илүү олон хувилбартай, илрүүлэх боломжийг нээж байгаа юм.

Г.АЗЖАРГАЛ