Ойрын жилүүдэд бид ийм хайр дүүрэн уран бүтээл цөөн үзсэн байх аа. Гэр бүлийн хайрын тухай өгүүлэх кино олон ч анги бүрдээ хайр, уучлал, ойлголцол, итгэлцлийг дуугарсан нь бараг үгүй шүү дээ. Үүгээрээ "Өвөөгийн хайр" уран сайхны кино үзэгчдэд хайрыг мэдрүүлж чадаж байна. Тамир эхнэр, хүүхдүүдээ аз жаргалтай, элбэг хангалуун, юунд ч санаа зовохгүй амьдруулах гэж хичээдэг ч өр ширэнд орж, унаж, босож яваа жирийн нэг сайн аав, сайн хань. Басхүү сүйхэйтэй сэргэлэн нэгэн. Заримдаа хүмүүс өөр дээрээ хариуцлага үүрэхгүйгээр "Амьдрал угаасаа ийм. Энэнээс илүү яах вэ дээ" гэх зэргээр амьдралд ханддаг.

     Тамир бол тийм нэгэн биш. Тэр хэчнээн баларч байсан ч хайртай хүмүүсээ хамгийн сайхан байлгахын төлөө өөрийгөө зориулж, зольж чаддаг эр хүн. Харин түүний хань Чука. Ухаалаг, тайван, үзэсгэлэнтэй эмэгтэй. Олон эмэгтэй үзэгч түүний дүрээс асуудалд хэрхэн хандаж болдгийг, юу ч болсон ямархан эерэг, зөөлнөөр даваад гардгийг үлгэр аван үзэж буй гэдэгт итгэлтэй байна. Ээж, эмэгтэй хүн гэхээрээ үглэдэг гэх нийтлэг ойлголт бидэнд бий. Чука үзэгч надад бол тэр бүхнийг эвдсэн, дөлгөөн эмэгтэй. Мөн эмэгтэй хүн хүлээцтэй, даруу, ухаалаг, хүмүүсийг ойлгодог байхад хань нөхөртөө хэчнээн дэм тустай байдгийг түүний дүрээс ч бас харж болохоор байна.

     Өөр өөрийн ертөнц, хүсэл мөрөөдөл, адал явдал, хэрсүү, сэргэлэн, томоогүй зангаараа өдөр бүрийг туулж яваа Соко, Тэмка, Нандика нар бол гарцаагүй киног амт оруулж буй чухал гол дүрүүд. Аав, ээжийнхээ чихнээс хонх уядаггүй, тэднийг цоллуулдаггүй, үгүй ядаж асуудал тулгарахад тэдэнд ханддаггүй хүүхэд гэж үгүй. Өсвөр нас болон бага ангийн сурагчдад тулгардаг, тэдэнд тохиолддог бүх л зүйлс тэдний дүрээр дэлгэцнээ дэлгэгдэж, эцэг, эхчүүд болон ойролцоо насны хүүхдүүд гарцаагүй өөрсдийгөө үзэж суугаа. Энэ л кино урлагийн ид шид, гайхамшиг. Мэдээж киногоороо зүгээр л нэгэн гэр бүлийн өдөр тутмын амьдралыг харуулна гэвэл бас жаахан дутмаг болно. Үүнийг тус киноны зохиолыг нь бичиж, найруулсан Д.Болорцэцэг уран бүтээлч нэгэн үйл явдлаар холбосон нь Тамирын ямар ч аргаар хамаагүй хүүхдүүдээ харах хүн олж эхнэртэйгээ гадаад явах гэсэн санаа. Тэр санаа нь Борис өвөөд Чукаг хорт хавдартай гэж хэлээд, Чукад харин Борис өвөөг хүнд өвдсөн гэж ойлгуулаад, муудалцсан байсан тэдний харилцааг сайжруулж, нэгдүүлж, эвлэрүүлсэн явдал. Хэдий бүх зүйл санаснаар нь болсон ч өнөөх худлаа яриа хэзээ нэг өдөр илрэх л болно.

   Гэхдээ энд тодроод буй нэг чухал санаа бол заримдаа бид хайртай хүмүүсээ хайрлахаа мартчихдаг. "Гайгүй байгаа даа" гээд л тоомжиргүйхэн явж байдаг. Заавал ямар нэгэн зүйлд тохиолдоход, эсвэл өвдсөн байхад нь хайраа зориулах гээд байдаг талтай. Өвдөөгүй байсан ч хайрлачихаж болдоггүй юм шиг. Энэ байдал энэ киноны аав, охин хоёрын харилцаан дээрээс харагдаж буй. Тамирын санамсаргүй худлаа хэлсэн нь аав охин хоёрын харилцааг харин ч сайжруулж, хүүхдүүдэд нь өвөөгийн хайрыг мэдрүүлж, амьдралд хүн хүндээ хэчнээн нөмөр тустай, хань бараатай байдгийн ойлгуулж буй. Энэ бүхэн дээр мэдээж Чамиа түүний хүү Болдоо, Тамирыг чангалаад буй Цоолоо зэрэг бусад дүрүүд чимэг болон орж ирж буй. Чукагийн эгч Чамиа бол энэ киноны хамгийн гоё, үзээд л баймаар, нэг тийм сэргэмээр гоё дүр байна лээ. Амьдралд юу ч болж байсан тийм сайхан гэгээн, дулаан, аз жаргалтайгаар л туулвал сайхан гэдгийг жинхэнэ харуулсан дүр болж чадсаныг тодотгомоор байна. Амьдралд хамгийн чухал гэр бүл. Гэр бүл дундаа нэгнээ уучилж, хайрлаж, ойлгож, дэмнэж, унавал өргөн босгож, ард нь бат зогсож, гундуухан өдөр нь сэргээж, гутарсан үед нь урмын сайхан үгс хэлж, сугадан алхаж, бараадан зогсож, балран бүтэлгүтэхэд нь тосон авч, уйлж суухад нь нулимсыг нь арчиж, мөрөө өгч аргадан тайтгаруулдаг хүн шиг хүн, аав шиг аав, ээж шиг ээж, ах шиг ах, эгч шиг эгч, дүү шиг дүү байж, өөрт заяасан бүхэндээ эзэн болохыг ойлголоо. Тэр дундаа өвөөгөө хамгийн их үгүйлэн санаж, өвөө минь байсан бол гэж өмөрч, өвөөтэй байгаа Болдоо, Тэмка, Соко, Нандика нарт атаархаж, гомдоох үед нь өмнөөс нь өмөөрч, өвөөдөө сайхан хандаж, баярлуулах үед нь "Сайн хүүхдүүд шүү" гэж тэднээр бахархан үзсэн. Энэ бол "Өвөөгийн хайр" уран сайхны кино. Төгсгөлийн ангиудыг сар шинийн өдрүүдээр ТВ9 телевизээр үзээрэй. Нэг дор бүх ангийг нь  VOO-гээс үзээрэй.