Ардчилсан намаас цаг үеийн асуудлаар мэдээлэл хийлээ. Тодруулбал,  тус намынхан 2020 оны УИХ-ын болон орон нутгийн ээлжит сонгуульд гаднын нөлөө орж, сонгуулийн санал тоолох машиныг хакертсан байж болзошгүй талаар мэдээлэл хийсэн билээ.  Тэгвэл үүнтэй холбоотой шалгалтын явц ямар байгаа талаар мэдээлэл хийлээ.

Нийслэлийн Ардчилсан намын зүгээс "Орон нутгийн сонгуулиар НИТХ-ын дага асан Ж.Батбаясгалан, ИТХ-ын гишүүн Г.Гангамөрөн нарыг мөнгө тарааж байсныг баталгаажуулсан. Мөн Чингэлтэй дүүрэгт мөнгө тарааж байсныг илрүүлж холбогдох хууль хяналтын байгуууллагад шалгуулах хүслтэй өгч байсан. Бидний гомдлыг шалгаж үзээд сонгуулийн хууль тогтоомж зөрчөөгүй гэх шийдвэр гаргасан ч бид дахин хүсэлт өгч шалгуулж байгаа" гэв.

Мөн энэ үеэр нийслэлийн Ардчилсан намын дарга Э.Бат-Үүл "Хоёр долоо хоногийн өмнө  цахим санал хураалтыг хакердах үйл ажиллагаа явуулахаар  МАН-ын зүгээс санал тавьсан иргэн бидэнд хандаж, хамтран мэдээлэл хийж байсан. Гэтэл тагнуул, цагдаа, прокурорын байгууллага асуудалд нухацтай хандсангүй. Тэр тусмаа гомдол гаргасан Нийслэлийн АН-д ямар ч хариу мэдэгдэлгүйгээр хэргийг хаасан. Хууль хяналтын байгууллага нийслэлийн АН-ыг дорд үзэж байна. Ийм байдлыг бид хүлээн зөвшөөрч чадахгүй. Тиймээс зургадугаар сарын 3-нд энэ хэргийг шалгахыг шаардаж эсэргүүцлийн цуглаан зохион байгуулна.  МАН-д үйлчилж байгаа хууль хяналтын байгууллагын хүмүүсийг явуулахыг шаардаж бид цуглана. Ингээд зогсохгүй Нийслэлийн АН-ын хорооны  дэргэд энэ хэргийг тусгайлан шалгах хороог өөрсдийн хороог байгуулна. Бидэнд үл тоомсорлосон байдалтай хандаж байгааг зөвшөөрөхгүй. Энэ асуудлыг шийдэхгүй бол дараа, дараагийн тэмцлийн хурц хэлбэрт шилжинэ" гэлээ.