Б.ЭНХБАЯР: Сургууль, цэцэрлэг барих газарт орон сууц бариад зараад байна

2021-05-31, 795

Ерөнхий сайд Л.Оюун-Эрдэнэ, Нийслэлийн Засаг дарга, Д.Сумъяабазар нар Баянзүрх дүүрэгт ажиллаж, тулгамдаж буй асуудалтай танилцлаа. Энэ үеэр тус дүүргээс сонгогдсон УИХ-ын гишүүн Б.Энхбаяр "БЗД-ийн 26 дугаар хороо нийслэлийн хамгийн их хүн амтай. 31 мянган хүн амтайгаас 18 хүртэлх насны 11 мянган хүүхэд бий. Энэ хорооны замын эсрэг талд БЗД-ийн 25 дугаар хороо байгаа. Уг хороонд 18 хүртэлх насны долоон мянган хүүхэд бий. Ингээд замын наана цаана хоёр 18 мянган хүүхэд байна. Энэ хүүхдүүдэд улсын сургууль, цэцэрлэг нэг ч байхгүй. Тэгэхээр эцэг, эхчүүд хүүхдүүдээ хотын өнцөг булан руу зөөж байгаа юм. Сүүлийн гурван жилд улсын төсвийн хөрөнгө оруулалтад суулгасан 15 тэрбум төгрөгөөр 640 хүүхдийн сургууль, 320 хүүхдийн цэцэрлэг ашиглалтад орно. Хамгийн ойрдоо гурван км болж байгаа юм.

БЗД-ийн 26, 25 дугаар хороонд ганцхан газар байгаа. БЗД-ийн 26 дугаар хороонд шүүхийн шийдвэр нь гарсан "Олимп" хотхон, 7500 мкв газар байна. БЗД-ийн 25 дугаар хороонд замын цагдаагийн журмын хашаа бий. Энэ хашаанд тээврийн цагдаагийн газар 10 давхар оффис барина гэсэн. Замын цагдаад өөр газар олдоно. Энэ асуудлыг Ерөнхий сайд та шийдэж өгөөч.

Үүнтэй холбоотойгоор УИХ-ын гишүүд Газрын тухай хуульд нэмэлт өөрчлөлт оруулах хуулийг санаачилсан. Төрийн байгууллагууд өөрийнхөө газарт хувийн өмч мэт байшин барьдаг асуудалд Засгийн газар хяналт тавихыг хүсэж, уг хуулийг санаачлаад байна. Сургууль, цэцэрлэг барих газарт орон сууц бариад зараад байна. Төрийн байгууллагууд өөрийн газарт хувийн орон сууц барьдгаа болих хэрэгтэй" гэлээ.

Ерөнхий сайд Л.Оюун-Эрдэнэ "Хотын нэгдсэн стандарт гэж хэрэгтэй байна. Хэдэн мкв талбайд хэдэн айл байх, хэдэн сургууль, цэцэрлэг байх вэ, өрхийн эмнэлэг нь хэд байх вэ гэдгийг тооцох ёстой байв. Иргэд болон хувийн хэвшлийнхний буруу биш. Аль болох ашигтай зүйл рүү явсан 30 жил. Цаашид ингэж явах боломжгүй учраас цаг алдалгүй нэгдсэн стандартад оруулах нь чухал.

Улаанбаатар хотын түвшинд шийдэж чадахгүй бол УИХ шийднэ. Төрийн байгууллагууд өөрийн газарт барилга барихыг хориглосон шийдвэр Засгийн газрын тогтоолоор гаргаж болно. Цаашид ингэж явбал бид дийлэхгүй" гэлээ.

Б.ЭНХБАЯР: Сургууль, цэцэрлэг барих газарт орон сууц бариад зараад байна

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0

Шинэ мэдээ

Нийтлэлчид