УИХ дахь Ардчилсан намын бүлгийн 13 гишүүн Их жанжин Д.Сүхбаатарын талбайд дөрөв дэх өдрөө өлсгөлөн зарлаж байна. Өнөөдөр хөл хориог сулруулсантай холбоотойгоор иргэд төв талбайд цуглаж, УИХ-ын 13 гишүүнтэй хамт тэмцлээ илэрхийлж эхэлсэн. Мөн М.Тулгат даргатай АН-ын гишүүд, Э.Бат-Үүл нар өлсгөлөн зарлаж байгаа гишүүдтэй уулзахаар төв талбайд очсон юм. Тэгвэл иргэдийн зүгээс Э.Бат-Үүл, М.Тулгат нарыг эсэргүүцэж, өлсгөлөн зарлаж байгаа УИХ-ын гишүүдтэй уулзуулахгүй хэмээн төв талбайгаас хөөлөө. Энэ үеэр Ардчилсан намын гишүүн, ардчиллын анхдагч Э.Бат-Үүл "Ардчиллын төлөө тэмцэж байгаа гишүүдээ дэмжих гэж л ирлээ. Эв санааны нэгдлээ илэрхийлэх гэлээ. Ардчилсан намынхан хүний үгийг сонсдог. Гэтэл ийм ардчилсан үзэлтнүүд гэж юу байсан юм. Хэзээ ийм ардчилагчид байсан юм. Ногоон малгайтнуудаас дор, коммунист, фашист юм уу хаашаа юм. Ийм байдалд хүргэсэн хүн нь У.Хүрэлсүх. Өнөөдөр хөл хориог сулруулсан учир би энд ирлээ. Баахан согтуу, хөлчүү хүмүүс авч ирээд Ардчилсан намыг айлгана гэж бодоод байгаа юм уу. Би Ардын намын дарангуйллын эсрэг ардчиллаа дэмжих гэж ирлээ, коммунистуудаа" гэв.