Залуухан Ерөнхий сайд Л.Оюун-Эрдэнэ өнөөдөр Тусгаар тогтнолын ордонд зурагчин хийгээд тун завгүй байгаа сурагтай. Ерөнхий сайдаар намын ах нар нь ээлж дараалан зургаа даруулж, намын даргатайгаа инээд алдан зогссон зургаа бие биеэсээ өрсөж цахим хаягтаа нийтэлж байгаа харагдана.

 

Намын олон гишүүн дундаас Ерөнхий сайдыг онцлон зургаа даруулж, “Зураг дарж өгсөн Ерөнхий сайд Л.Оюун-Эрдэнэдээ баярлалаа” хэмээн тайлбарлан бичсэн нь намын томчууд хэчнээн амбицтай байгааг  илтгэх шиг.

 

Өнөөдөр МАН-ын Удирдах зөвлөл хуралдаж, Ерөнхийлөгчид нэр дэвшигчээ тодруулж байгаа. МАН-аас Ерөнхийлөгчийн сонгуульд нэр дэвших боломжтой таван хүнийг зарласан. Тодруулбал, Ерөнхий сайд асан У.Хүрэлсүх, УИХ-ын дарга Г.Занданшатар, Сангийн сайд асан Ч.Хүрэлбаатар, УИХ-ын гишүүн С.Батболд, Эрүүл мэндийн сайд асан Д.Сарангэрэл нарыг Ерөнхийлөгчийн сонгуульд нэр дэвүүлэх боломжтой хэмээн тус намын Удирдах зөвлөлийн хуралдаанаар хэлэлцэж, Монгол Улсын 30, 31 дэх Ерөнхий сайд У.Хүрэлсүхийг Ерөнхийлөгчид нэр дэвшүүлэхээр гишүүд 100 хувь дэмжжээ.  Ийн эрх баригч намын дарга Ерөнхийлөгчийн сонгуульд намаасаа өрсөлдөгчгүйгээр нэр дэшихээр болсон байна.