Ардчилсан намын дотоод сонгуулийн хороо Ерөнхийлөгчид нэр дэвшигчээ тодруулжээ. Хоёр тамга, хоёр даргатай болсон тус нам хоёр хэсэг Ерөнхийлөгчид нэр дэвших сунгааныг явуулсан билээ. Тодруулбал, О.Цогтгэрэл даргатай Ардчилсан намын Дотоод сонгуулийн хороонд дөрвөн хүн бүртгүүлсэн. Тодруулбал, УИХ дахь АН-ын бүлгийн дарга Д.Ганбат УИХ-ын гишүүн Н.Алтанхуяг, С.Ганбаатар, УИХ-ын гишүүн асан Х.Тэмүүжин нар нэр дэвших хүсэлтээ хүргүүлснээс Х.Тэмүүжин өөрийн хүсэлтээр нэрээ татсан билээ.

Харин М.Тулгат даргатай тус намын Дотоод сонгуулийн хороонд УИХ-ын гишүүн Д.Ганбат, УИХ-ын гишүүн асан С.Эрдэнэ, Ц.Оюунгэрэл, Л.Гүндалай, Р.Амаржаргал нар хүсэлтэй өгсөн. Тэдний хүсэлтийг Дотоод сонгуулийн хороо хүлээн авч, нэр дэвшиж, өрсөлдсөн.

Тэгвэл  О.Цогтгэрэл даргатай Ардчилсан намаас Ерөнхийлөгчийн сонгуульд нэр дэвшигчээр Н.Алтанхуяг тодорчээ. Түүний тухайд өнгөрсөн удаагийн УИХ-ын сонгуулиар намаасаа хөөгдөж, бие даан нэр дэвшсэн байдаг. Харин түүнийг Ардчилсн нам бүртгэсэн эсэхийг өнөөдрийг хүртэл эцэслээгүй байгаа юм.