УИХ-ын гишүүн С.Ганбаатар МАХН-ын гишүүнчлэлээс татгалзаж, АН-д элссэнээ албан ёсоор зарласан. Энэ мэдээлэлтэй холбоотойгоор АН-ын дарга асан С.Эрдэнэ  байр сууриа илэрхийлжээ.

Тэрбээр "Аливаа асуудлыг дүрмийн дагуу шийдвэрлэдэг байх ёстой! УИХ-ын гишүүн С.Ганбаатар МАХН-аас гарч АН-д элслээ гэжээ. АН-д хэн нэг УИХ-ын гишүүн С.Ганбаатар гэж хүнийг элсүүлээгүй гэдгээ албан ёсоор мэдэгдэж байна. Дүрмийн бус хэсэг бүлэг хүмүүс АН-ыг төлөөлөх эрхгүй" хэмээн нийтэлсэн байна.

УИХ-ын гишүүн С.Ганбаатар  МАХН-ын гишүүнчлэлээс татгалзах үеэрээ "2021 оны дөрөвдүгээр сарын 19-нд МАН, МАХН хоёр нэгдэж, хурлаа хийж байгаа. Энэ хоёр намын хуралд би хүндэтгэлтэй хандаж байгаа. Сайнхүү овогтой Ганбаатар миний бие 2017 оны тавдугаар сарын 16-нд МАХН-д элссэн. Ингээд Монгол Улсын Үндсэн хууль, Улс төрийн намын тухай хуульд заасны дагуу МАХН-ын гишүүнчлэлээс өнөөдөр татгалзаж буйгаа албан ёсоор мэдэгдэж байна. Эрх баригчдтай хамтарч тэмцэж, ганцаардаж байхад хань болж байсан МАХН-ын журмын нөхөд удирдлага хамт олондоо сайн сайхныг хүсэж байна. Монголын баялгийг идэж байгаа эрх баригчдтай би нэгдэх боломжгүй учраас ийм шийдвэр гаргаж байна. УИХ дээр Эрдэнэтийн ард түмнийхээ дуу хоолойг хүргэх болно. Парламентад байгаа МАН-ын 62 суудлыг 63 болгох гэж Эрдэнэтийн ард түмэн надад санал өгөөгүй"  хэмээн мэдэгдээд буй.