Хууль зүйн байнгын хорооны хуралдаанаар Үндсэн хуулийн цэцийн дүгнэлтийг хэлэлцэж байна. Цэц өнгөрсөн баасан гарагт хуралдаж, Ерөнхийлөгчийн сонгуулийн тухай хуулийн зарим заалт Үндсэн хууль зөрчсөн гэсэн дүгнэлтийг гаргасан. Тодруулбал, өмнө нь Ерөнхийлөгчөөр ажиллаж байсан болон одоогийн Ерөнхийлөгч дахин Ерөнхийлөгчийн сонгуульд нэр дэвших эрхгүй гэдгийг хуульд тусгаагүй нь Үндсэн хууль зөрчсөн гэж үзсэн юм. Хэлэлцэж буй асуудалтай холбоотой гишүүд асуулт асууж, үг хэлж байгаа юм.

УИХ-ЫН ГИШҮҮН Т.ДОРЖХАНД: УИХ-ын гишүүн Д.Ганбат та, бүхэл бүтэн улс төрийн намыг тоглоомын нам гэж хэлж болохгүй. Хариуцлагатай байгаарай. Энэ парламентын алдаа нь үнэн шүү дээ. Тодорхой  дөрвөн заалтаас нэгийг нь авч үлдээд гурвыг нь оруулчихсан. Зөвхөн нэг удаа зургаан жилээр сонгогдоно гэж байгаа. Үүнийг нь би чуулган дээр асуусан. Үүнд хэн ч тайлбар өгөөгүй шүү. Та бүхэн Х.Баттулгатай ямар тохироотой байсныг нь мэдэхгүй. Ардчилсан намынхан та нар нэг хүний төлөөх нам юм уу, Монголын ардчиллын төлөөх нам уу гэдгээ тодорхой хэлээрэй. Зарчим хууль, дүрэм ярихаар хувь хүн рүү халдаж болохгүй. Үндсэн хуулийн цэц дээр асуудал байна. Ерөнхийлөгч энэ асуудлыг хэлэлцэхгүй гэдэг дээр маш их нөлөө орсон. Хуралдааны танхимд маш халуун үйл явдал өрнөсөн. Гэхдээ маш эрүүл мэтгэлцээн болсон.

УИХ-ЫН ГИШҮҮН Н.АЛТАНХУЯГ: Үндсэн хуулийн баталж байхад Ц.Бямбацогтоо, чи Ерөнхийлөгч нэр дэвших боломжтой гэж байсан. Өнөөдөр Цэц ингээд шийдчихлээ гэх юм. Дандаа буруугаа бусад руу чихдэг. Бусдын гараар могой бариулдаг. Энэ цэвэр Ардын намын лобби. Бага суудлын хуралдаан болж байхад гурван хүний нэгийг нь татаж ирж өөр хүн оруулаад, дунд суудлын хуралдааны бүрэлдэхүүнийг өөрчилсөн. У.Хүрэлсүх гэдэг нэг хүнд зориулсан шийдвэр гэж байгаа юм. Цэцийн дүгнэлтийн ямар шуурхай оруулж ирдэг болчихсон юм.Та нар Х.Баттулгыгаа дарж байгаад У.Хүрэлсүх гэдэг Ерөнхийлөгчтэй болоод амар сайхандаа жаргах нь дээ. Ингэж өрсөлдөгчөө хууль бусаар гаргах юм бол өрсөлдөөн явуулах хэрэг байгаа юм уу.

УИХ-ЫН ГИШҮҮН Д.ГАНБАТ: Хэнийг сонгох сонгохгүй вэ гэдгээ ард түмэн өөрсдөө мэдэг. Бүтэн жилийн хугацаанд хэнийг сонгохоо бэлдчихсэн байсан шүү. Тоглоомын нам гэдэг чинь үнэн. Дагуулах намтай болох гээд МАН үзээд байгаа. АН-ыг ч гэсэн хоёр хуваачихсан. Энд үнийг нь ярихгүй бол хаана ярих вэ.