УИХ-ын гишүүн Ё.Баатарбилэг өнгөрсөн амралтын өдрүүдэд Архангай аймагт очсон бөгөөд тусгаарлагдалгүй намын гишүүдтэй уулзалт хийсэн гэх мэдээлэл өчигдөр цахим орчинд түгсэн. УОК-оос улсын хэмжээнд хатуу хөл хорио тогтоож, зайлшгүй шардлагатай иргэд болон хүнс, ачаа тээврийн машиныг  хот хооронд зорчуулж байгаа. Тиймээс "УИХ-ын гишүүн олноороо хөдөө орон нутагт зорчлоо" хэмээн иргэд шүүмжлээд буй. Энэ талаар УИХ-ын гишүүн Ё.Баатарбилэг цахим хаягаараа дамжуулж тайлбар хийлээ. 

Тэрбээр "Өчигдөр олон нийтийн сүлжээгээр надтай холбогдуулан худал мэдээлэл нэлээд сэвэх шиг боллоо. Уучлаарай, өндөр настай ээжий маань жаахан тэнхээрхээд, яаравчлан ирэхдээ УОК, АОК-ын бүх шаардлагыг биелүүлээд, баахан хүмүүс дагуулж ирэх байтугай жолооч ч үгүй өөрөө машинаа барьж ирсэн. Настныхаа биеийг тогтворжихоор хот руу нарийвчилсан үзлэгт авч явах санаатай чимээгүйхэн хүлээж байна. Юун намын хурал, юун дагуулж явдаг хэвлэлийн багтай мантай. Хувийн асуудлаа арга буюу бичиж тайлбар тавиад сууж байгаадаа харамсаж байна. Тэр тусмаа намайг ямар шалтгаанаар ирснийг мэдсэн нутгийн залуус, зарим нөхдүүд хүртэл улайран сэвж байгааг хараад гуниг төрж байна. Аймагт ирснээс хойш хоёр ажлыг утас, цахимаар амжууллаа.

Нэгдүгээрт, ”Залуучууд чимээгүйхэн хорвоог орхисоор байна...” Энэ бол уржигдар манай улсын В, Д вирустай иргэдийн ТББ-ынхантай Ж.Чинбүрэн гишүүн бид хоёр цахимаар хуралдахад нэг залуугийн хэлсэн гашуун үнэн үг. Архангай аймгийн хэмжээнд В вирусийн архаг халдвартай 3500 гаруй хүн байгаагаас Д вирус хавсарсан маш олон хүн (магадлалаар 2300 орчим) байгаа, улсын хэмжээнд 100 мянга хол давсан тоо гарахаар байна. Эмчилгээний хамгийн сүүлийн үеийн үр дүнтэй эм тариа хэрэгслийг Монгол Улсад хэрхэн оруулж ирж, энэ олон хүний амь насыг аврах боломж байна вэ гэж зөвлөлдөж, Улаанбаатар хот, 10 гаруй аймгаас цахимаар оролцож хуралдлаа. Үр дүнд хүргэхийг зорьж, хичээж ажиллах болно. 

Хоёрдугаарт, Аймгийн Нэгдсэн эмнэлгийн дарга Оюунтүвшингээс хүсэлт тавьсны дагуу Эрүүл мэндийн сайд, ЭМДЕГ-ын дарга нартай утсаар ярьж, Архангай дахь Ковидын нөхцөл байдал, эмчилгээний зардлыг ЭМД-ын сангаас яаралтай шийдүүлэх талаар ойлголцолд хүрлээ. Ийм л байдалтай байна. Халдварт өвчин хурдан илааршиж, ханиадгүй цаг ирээсэй, хамаг монголчууд бие биенээ хардаж сэрдэн хэмлэдэггүй сайн цаг дөхөөсэй" хэмээжээ.