Э.БАТ-АМГАЛАН: Манай нэг туслахаас коронавирусийн эерэг тохиолдол бүртгэгдсэн

2021-04-07, 1082

УИХ-ын гишүүн Э.Бат-Амгалан, С.Чинзориг нарын туслахаас коронавирусийн халдвар илэрчээ. Тодруулбал, УИХ-ын Тамгын газраас ажилчдыг энэ сарын 05-ны өдөр Улсын хоёрдугаар төв эмнэлэгт PCR шинжилгээнд нэгдсэн журмаар хамруулсан байна. Энэ үеэр хоёр эерэг тохиолдол илэрчээ. УИХ-ын Тамгын газрын ажилчдыг 50 хувийн дүүргэлттэй долоо хоногоор ээлжээр ажиллуулах чиглэл өгчээ.

Энэ талаар УИХ-ын гишүүн Э.Бат-Амгалан цахим хаягаараа дамжуулан тайлбар хийсэн байна. Тэрбээр "Олон нийтийн сүлжээнд миний болон УИХ-ын гишүүн С.Чинзоригийн туслахуудаас коронавирусийн халдварын эерэг тохиолдол бүртгэгдсэн талаар мэдээлэл гарчээ. Манай ажлын алба нийт таван алба хаагчтай бөгөөд нэг зөвлөх, нэг туслах, гурван бие төлөөлөгчтэй үйл ажиллагаа явуулдаг.

Ажлын албаны залуучууд цаг тухай бүрд нь шинжилгээ болон дархлаажуулалтад хамрагдсан бөгөөд нэг туслахаас коронавирусийн эерэг тохиолдол бүртгэгдсэн. Үүнтэй холбогдуулан би бөгөөд манай ажлын алба цахимаар ажиллах шаардлагатай болсон. УИХ-ын чуулган, холбогдох Байнгын хорооны хурал, хуваарийн дагуу уулзалтыг цахим хэлбэрээр хийж байна.

Өнөөдөр л гэхэд Монгол Улсад шинээр 575 шинэ тохиолдол бүртгэгдсэн бөгөөд иргэд та бүхнийг халдвар хамгааллын дэглэмээ чанд мөрдөж, дархлаажуулалтад идэвхтэй хамрагдаж ковидгүй зуны төлөө хамтдаа зүтгэхийг уриалж байна" хэмээсэн юм.

Өнөөдөр Засгийн газрын ээлжит хуралдаанаар хатуу хөл хорио тогтоох эсэх асуудлыг хэлэлцэж байгаа бөгөөд мэргэжлийн байгууллагууд хөл хорио тогтоохгүй бол халдварын тархалт нэмэгдэнэ гэдгийг анхааруулж байгаа юм.

Э.БАТ-АМГАЛАН: Манай нэг туслахаас коронавирусийн эерэг тохиолдол бүртгэгдсэн

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.