УИХ-ын гишүүн асан Н.Номтойбаяр өнөөдөр суллагджээ. Энэ талаараа тэрбээр өөрийн цахим хуудсаар дамжуулан мэдээлэв.

Тэрбээр “Та бүгд сайн байна уу. "Улс төрийн хорион"-нд 307, ажилласны шагналд +57 хоног авч, хилс ялыг шоронд дуусгав. Надад итгэсэнд баярлалаа. Таны зөв гэдгийг би удахгүй батална. Би та бүгдийн адил сураггүй болсон шудрага ёс, шуналгүй, өсгүй, ёс зүйт улс төрөөр маш их цангаж байна” гэжээ.

Түүнийг “Хөдөлмөр эрхлэлтийг дэмжих сан”-тай холбоотой төслүүдийг эргэн төлөлтгүй хэрэгжүүлэх тогтоол гаргаж, улсад 3.9 тэрбум төгрөгийн хохирол учруулсан гэж яллагдагчаар татаж, анхан шатны шүүхээс 5.5 жилийн хорих ял оноосон. Түүний өмгөөлөгчид бүх шатны шүүхэд хандаж,  Улсын дээд шүүхээс Н.Номтойбаярт нийтийн албанд томилогдох эрхийг хоёр жилийн хугацаагаар хасаж, нэг жил хорих ял болгон бууруулж, шийдвэрлэсэн билээ.

УИХ-ын гишүүн асан Н.Номтойбаярыг 2020 оны УИХ-ын сонгуульд бие даан Хан-Уул дүүрэгт нэр дэвшиж, нэр дэвшигчийн үнэмлэхээ авсных нь дараа цагдан хорьсон. УИХ-ын сонгуульд нэр дэвшигчид үнэмлэхээ гардан авсны дараа сурталчилгаагаа албан ёсоор эхлүүлдэг. Тэгвэл Н.Номтойбаярыг нэр дэвшигчийн үнэмлэх нь баталгаажсаны дараа саатуулсанд ар гэрийнхэн нь хууль зөрчсөн хэмээн шүүмжилж байв.