Төр нийгмийн нэрт зүтгэлтэн С.Зоригийн амийг онц хэрцгийгээр хөнөөсөн хэргийг улсын нууцаас гаргахаар болжээ. 

Энэ талаар Хууль зүй, дотоод хэргийн сайд Х.Нямбаатар өөрийн цахим хаягтаа “Өнөөдрийн Засгийн газрын хуралдаанаар С.Зориг агсны амийг хөнөөсөн хэргийн материал холбогдох бичлэгүүдийг бүхэлд нь нууцаас гаргахаар шийдвэрлэсэн” гэж мэдэгдсэн байна.

Өнөөдөр С.Зоригийн амийг хөнөөсөн хэргээр ял эдэлж буй Т.Чимгээ, Б.Содномдаржаа нарыг эрүүдэн шүүсэн гэх хэрэгт холбогдсон Б.Хурц нарын есөн хүний шүүх хурал болж, Монгол Улсын дээд шүүхээс Б.Хурцад 1.6 жил, Г.Эрдэнэбатад нэг жилийн хорих ял, бусад холбогдох хүмүүст хоёр жилийн хорих ял оноох шийдвэр гаргасан.

Түүнчлэн С.Зориг агсны амийг хөнөөсөн хэргийг нууцын зэрэглэлээс гаргах асуудлыг судлан шийдвэрлэж өгөх хүсэлтийг Ерөнхийлөгчийн зүгээс Засгийн газарт хүргүүлээд байсан билээ.

Төрийн болон албаны нууцын тухай хуулийн 10 дугаар зүйлийн 10.1.5-д “мэдээллийг төрийн болон албаны нууцад хамааруулах, нууцыг шилжүүлэх, ил болгох, нууцын зэрэглэл тогтоох, өөрчлөх, нууцын хугацааг сунгах” нь Засгийн газрын бүрэн эрхийн асуудал тул С.Зоригийн хэргийн материалыг нууцын зэрэглэлээс гаргах асуудлыг  эцэслэн шийдвэрлэсэн байна.