Ардчилсан намаас "Шонхор таурт" цаг үеийн асуудлаар мэдээлэл хийлээ. Энэ үеэр Ардчилсан намын дарга С.Эрдэнэ "Хууль ёсны эрх бүхий намын явуулсан сонгуулийн үр дүнгээр М.Тулгат Ардчилсан намын дараагийн дарга болсон. Энэ дүнг бид ҮБХ, Их хурлаараа баталгаажуулна. Хоёр нам, хоёр даргатай болчихлоо гэсэн зүйл яриад байгаа. Би нэг зүйл хэлье. Монгол Улсад нэг л хууль үйлчилдэг. Үүний дагуу нэг л хуулийн этгээд бий. Хууль эрх зүйн дагуу хоёр Ардчилсан нам гэж байхгүй. Улсын дээд шүүхийн тогтоолтой, УБЕГ бүртгэлтэй цорын ганц Ардчилсан нам нь энд байна.

2017 оны  хоёрдугаар сард болсон VII Их хурлын 03 дугаар тогтоолоор АН шинэ даргаа сонгосон. Тэр би. Намын даргын сунгаанд би хамгийн их санал авч батлуулсан. Үүнээс хойших бүх хурлаар намын эрх зүйн асуудалтай холбоотой нэг ч асуудал яриагүй. Намын X Их хурлыг хүчингүй гэж Улсын дээд шүүх үзсэн. Улсын дээд шүүхийн Иргэний танхим хоёр удаа хуралдсан. Ингээд намын бүртгэл, намын даргатай холбоотой нэг ч асуудал хэлэлцээгүй. Намын Их хурал болон, шинэ дүрэмтэй холбоотой асуудлаар л хуралдсан. Улсын дээд шүүхийн  дөрөвдүгээр тогтоолыг мушгин гуйвуулаад байгаа юм. Ардчилсан намын даргын асуудлаар Улсын дээд шүүхийн цахим мэдээллийн санд С.Эрдэнийг хасаад, Ц.Тувааныг үүрэг гүйцэтгэгчээр бүртгэсэн байсан. Үүнийг нь хууль зөрчсөн гэж үзээд Ц.Тувааныг хассан. Гэхдээ намайг дахин цахим санд бүртгэх хүсэлтийг хангах боломжгүй гэсэн. Өнөөдөр Улсын дээд шүүхийн тогтоол, Их хурлын тогтоол хэвээр байгаа цагт цахим мэдээллийн санд тэмдэглэсэн мэдээллийг сэргээх ёстой. Ц.Туваанд хүнд үзүүлэх ямар ч эрх зүйн акт байхгүй. Ардчилсан намыг төлөөлөх эрх байхгүй. Улсын бүртгэлийн гэрчилгээн дээр Ардчилсан намын дарга С.Эрдэнэ гэж бүртгэсэн байгаа. Хүчин төгөлдөр гэрчилгээ нь энэ" гэлээ.