Ардчилсан намын Дотоод сонгуулийн хорооны дарга И.Мөнхжаргал намын даргын сонгуулийн санал хураалтын урьдчилсан мэдээг танилцууллаа.

Уламжлалт  буюу цаасан хэлбэрээр зохион байгуулсан энэ сонгуулийн урьдчилсан мэдээгээр УИХ-ын гишүүн О.Цогтгэрэл ялалт байгуулжээ. Энэ талаар Дотоод сонгуулийн хорооны дарга И.Мөнхжаргал "Нийт 21 аймаг есөн дүүргээс урьдчилсан дүн ирээд байна. Нийт 154174 саналын хуудас бичигдсэнээс 74908 хүн саналаа өгч, нийт сонгогчдын 46,9 хувь нь сонгуульд оролцлоо. 

• Д.Пүрэвдаваа 6041 санал буюу 7334,1 оноо
• О.Цогтгэрэл 41199 санал буюу 41501 оноо
• О.Амартүвшин 16075 санал буюу 16050 оноо
• С.Эрдэнэболд 8928 санал буюу 10198 оноо авсан байна. Урьдчилсан байдлаар нэр дэвшигч О.Цогтгэрэл хамгийн их санал авч, ялалт байгуулж байна. Нийт сонгогчдын оноог тооцох аргачлал нь УИХ-ын мандатын тоотой тэнцүү оноогоор тооцдог. Ардчилсан намын даргын сонгуульд хамгийн өндөр санал авсан нэр дэвшигчээ намын Их хуралд танилцуулдаг. Дотоод сонгуулийн хорооноос О.Цогтгэрэлийг Их хуралд өргөн мэдээлнэ. Үүний дараа намын даргыг Улсын дээд шүүхэд бүртгүүлнэ. Ардчилсан намын Үндсэн дүрмээр зохион байгуулсан Дотоод сонгуулийн хороо сонгууль зохион байгуулж нэр дэвшигчээ нийтэд зарлаж байна. Цаашдаа шүүх дээр намын даргаа бүртгүүлэхэд ямар нэгэн дүрмийн зөрчилгүй гэж үзэж байгаа учраас О.Цогтгэрэлийг Дээд шүүхэд бүртгүүлээд намаа удирдана" гэлээ.