УИХ-ын гишүүн, “Босоо” хочит С.Ганбаатарыг Ерөнхийлөгчийн сонгуульд дахин нэр дэвших вий гэдгээс эрх баригч намынхан нэлээд айж байгаа сурагтай. Хэдий тэд гол өрсөлдөгчөөрөө өөр хүн тооцоолсон ч МАН-ынхны саналыг хуваах, өрсөлдөгчид нь давуу байдал бий болгох ганц хүн нь С.Ганбаатар юм.

           УИХ-ын сонгуульд ялалт байгуулсныхаа дараа хэсэг чимээгүй байсан тэрбээр он гарснаас хойш улс төрийн ажилдаа идэвхийлэн оролцож, Оюутолгойн асуудлаар суулт зарлаад амжсан. Өчигдөр гэхэд УИХ-ын гишүүн Сү.Батболдыг мэтгэлцээнд дуудсан ч нөгөөх нь ирсэнгүй. Энэ нь С.Ганбаатарт аз болж, нэр хүндээ өсгөх, өөрийгөө тултал нь хөөрөгдөх боломж болсон гэхэд хилсдэхгүй. Угтаа бол   түүнийг Ерөнхийлөгчийн сонгуулийн пи-араа эхлүүлсэн гэж хэлж болно.

        Монголын үйлдвэрчний эвлэлийн гишүүнээс УИХ-д сонгогдсон түүнийг 2017 оны Ерөнхийлөгчийн сонгуульд анх нэр дэвшихэд нь “Ганбаатарын өрсөлдөгч гэж юу байх вэ” гээд тоохгүй хаячихсан. Гэтэл  МАН-ынхны тооцоолол эсрэгээрээ эргэж, золтой л С.Ганбаатар гэдэг Ерөнхийлөгчтэй болчихоогүй. Тухайн үед сонгогчид “Хөөрхий, Ганбаатарт ямар хөрөнгө, мөнгө байх биш. Олон жил Үйлдвэрчний эвлэлд бидний төлөө дуугарсан юм” хэмээн саналаа өгсөн гэх цуу яриа ч байдаг. Энэ удаад тэрбээр илүү туршлагатай болсон нь тодорхой. Харамсалтай нь, Ерөнхийлөгчийн сонгуульд нэр дэвших эрхээ өвөртлөсөн түүнийг намын дарга Н.Энхбаяр нь намаасаа нэр дэвшүүлэхгүй гэж мэдэгдээд байгаа. Нэг ёсондоо МАХН-ын дарга МАН-тай гар барилцаж, Ерөнхийлөгчийн сонгуульд Ардчилсан намын эсрэг оролцоно гэдгээ илэрхийлсэн гэсэн үг. Мэдээж энэ нь С.Ганбаатарт таатай санагдахгүй байгаа нь тодорхой.

         МАН-ынхан энэ удаагийн сонгуульд АН-тай л өрсөлдөнө гээд бэлтгэл ажлаа эртнээс базааж, Их хуралд суудалтай бусад намыг “атгандаа оруулчихсан” яваа. Хэдий дөрвөн нам Ерөнхийлөгчийн сонгуульд өрсөлдөх эрхтэй ч гол өрсөлдөөн АН, МАН-ын хооронд л болно. Бусад намын нэр дэвшигчид санал хуваах, өрсөлдөөнийг “амттай” болгохоор оролцох нь гэх таамаг бий. Уг нь бол эрх баригчдын тооцоолсноор АН ба бусад буюу МАН-ынхан ялалт байгуулж, үлдсэн нь АН-ын саналыг хуваах л зорилгыг тээж байв. Гэтэл “Босоо Ганбаа” Ерөнхийлөгчийн сонгуульд нэр дэвшинэ гээд зүтгэчихсэн учраас МАН-ын санал хуваагдах нь гээд эрх баригчдын толгой гашилж буй гэх бор шувуу нисэх болжээ.

          Эрх баригчдын тооцооллоор  С.Ганбаатарыг нэр дэвшүүлэхгүй байх ганц арга нь МАН МАХН-ын нэгдэл байв. Ингээд Н.Энхбаяртай тохиролцож, түүнийг МАН-д санасан өс хонзонгоо хойш тавих хүртэл нь ашигтай санал тавьсан бололтой. Н.Энхбаяр ч МАН-ын одоогийн удирдлагуудыг мөнхийн дайсан мэтээр үзэж байсан ч саяхан 100 жилийнхээ ойг хамтран тэмдэглэж, У.Хүрэлсүхтэй ихэд дотноссон харагдана. Олны таамгаар Н.Энхбаяр Ерөнхийлөгчийн сонгуулиар У.Хүрэлсүхийг дэмжиж, нөхөн сонгуульд өөрийнхөө хүү Э.Батшугарыгаа дэмжүүлэхээр ярицсан гэдэг. Энэ нь ч үнэний ортой бололтой. Өөрөөр хэлбэл, Н.Энхбаяр МАН-тай тохиролцоонд хүрсэн ч С.Ганбаатарыгаа барьж дийлээгүй гэх цуу яриа бий. Түүнийг Ерөнхийлөгч Х.Баттулгатай хүч хавсрах нь гэх яриа ч байна.

        УИХ-ын ээлжит сонгуульд МАХН, ИЗНН, МУНН зэрэг гурван нам эвсэж “Та бидний эвсэл”-ийг байгуулсан. Ингээд энэ эвслээс С.Ганбаатар УИХ-д сонгогдчихсон учир түүнд намынхаа даргатай ойлголцохгүй байх нь хүндрэлтэй асуудал биш. Өөрөөр хэлбэл, тэрбээр МАХН-аас биш юмаа гэхэд ИЗЗН эсвэл МУНН-аас нэр дэвшиж болох нь. Тиймээс л  сүүлийн үед С.Ганбаатар улс төрд нэлээд шийдэмгий, зоригтой дуугарах болсон биз. Ерөнхийлөгчийн сонгуульд ялалт байгуулдаггүй юм аа гэхэд МАН-ынхны  үйлийг үзчих хэмжээний карьер түүнд бий.