УИХ дахь Ардчилсан намын бүлэг ээлжит хуралдаанаа хийж, хэлэлцсэн асуудлын талаар мэдээлэл өглөө. Энэ талаар АН-ын Бүлгийн дарга Д.Ганбат "Бүлгийн хуралдаанаар УИХ-д хоёр хуулийн төсөл яаралтай өргөн барих нь зүйтэй гэж үзлээ. Нэгдүгээрт, Шилэн дансны тухай хууль. Энэ хуулийн төслийг сайжруулах шаардлагатай гэж үзсэн.

Тэгэхгүй бол үүнийг шантаажны хэрэгсэл болгон ашигладаг болжээ. Засгийн газарт энэ хуулийн төслийг өргөн барьсан ч хүлээж аваагүй байна лээ. Татвар төлөгчдийн нэг төгрөг ч гэсэн иргэдийн хяналтад байх ёстой. Татвар төлөгчийн мөнгийг үр ашиггүй зарцуулж байгаа асуудал дээр хяналт тавих болжээ. Хоёрдугаарт, өндөр настны тэтгэврийн  доод хэмжээг 500 мянган төгрөг болгох шаардлага байна. Үүнийг мөн л Засгийн газар хүлээж авсангүй. Мөн манай намын бүлэг "Эрүүл мэнд, эдийн засгаа дэмжих 10 их наядын цогц төлөвлөгөө"-г Засгийн газар танилцуулах ёстой гэсэн шаардлага тавьж байгаа. Цар тахлын үеийн хууль батлагдсантай холбоотой энэ төсөл УИХ-аас гадуур явж байгаа. Гэтэл төсвийн мөнгө үр ашиггүй зарцуулагдаж байна" гэлээ.  Мөн "Засгийн газар өмнө нь "Нэг хаалга-Нэг шинжилгээ" арга хэмжээг зохион байгуулсан. Үүнд 33 тэрбум төгрөг зарцуулсан гэж байгаа. Гэтэл ямар ч үр дүнгүй өнгөрлөө. Бид хотын дарга Д.Сумъяабазарт хариуцлага тооц гэсэн хариуцлага тооцсонгүй" гэлээ.