УОК-оос цаг үеийн асуудлаар мэдээлэл хийж байна.  Тодруулбал, насанд хүрсэн хоёр сая иргэнээ долдугаар сарын 1 гэхэд вакцинжуулж дуусгах төлөвлөгөө гаргасан талаараа танилцуулав.

Шадар сайд С.Амарсайхан "Хоёрдугаар сарын 23-наас иргэдээ дархлаажуулах ажлаа эхлүүлсэн. Засгийн газар, УОК-оос иргэдээ хоёр үе шаттай вакцинжуулахаар төлөвлөсөн. Төлөвлөгөөний дагуу эхний ээлжинд халдварын голомт болсон Улаанбаатар хотын  нэг сая иргэнийг гурав, дөрөвдүгээр сард багтаан вакцинжуулахаар төлөвлөөд байна. Хоёрдугаарт, ногоон бүс болох орон нутгийн иргэнийг тав, зургадугаар сард дархлаажуулна гэх төлөвлөгөө гаргаад байна.

Ингээд долдугаар сарын дунд үе гэхэд вакцинжуулалтын ажлаа дуусгана. Бид дархлаажуулалтын ажлыг түргэн шуурхай зохион байгуулж байсан туршлагатай. Өнгөрсөн хугцаанд бид эхний ээлжийн зорилтод бүлэг олон халдварын голомтод ажиллаж байгаа 16 байгууллагын 15 мягнга гаруй хүнд Астразенека вакциныг хийсэн байна.