Засгийн газрын ээлжит хуралдааны шийдвэрийг Шадар сайд С.Амарсайхан танилцуулав. Тэрбээр "Гуравдугаар сарын 1-нээс хөдөө орон нутгийн сургуулиудын танхимын хичээлийг эхлүүлсэн. Харин нийслэлд танхимын сургалтыг хэзээнээс эхлүүлэх нь тодорхойгүй байна. 

УОК, Засгийн газрын хуралдаанаар хэлэлцүүлж, салбарын яам, салбарын сайдын санал дүгнэлтийг үндэслэн эцсийн шийдвэрийг гаргана. Одоо шууд бүх үйл ажиллагааг зэрэг нээж болохгүй. Шинэ дүрэм журам хангалттай сайн мөрдөгдөж эхлээгүй учраас нийслэлд сургууль, цэцэрлэгийн хичээлийг шууд эхлүүлэх нь эрсдэлтэй. Тиймээс цаг үеийн нөхцөл байдлаа харж, шийдвэрээ гаргана. Энэ хоёрдугаар улиралдаа багтааж, вакцинжуулалтаа хийхээр төлөвлөсөн. Гэхдээ манайд мутацид орсон шинэ төрлийн вирус орж ирэх өндөр магадлалтай байна" гэлээ.