УОК-оос мэдээлэл хийж байна. Энэ үеэр Эрүүл мэнд сайд С.Энхболд “Дэлхий нийтэд коронавирусийн халдвар бүртгэгдсэнээс хойш жил гаруй хугацаа өнгөрөөд байна. Манай улс дотооддоо халдвар алдсанаас хойш 100 гаруй хоног өнгөрлөө. Энэ хугацаанд хоёр удаагийн хатуу хөл хорио тогтоосон. Эрдэмтийн судалгаагаар хэрэв хоёрдугаар сард хөл хорио тогтоохгүй бол халдварын тоо 5000-6000-д хүрч, эмнэгийн байгууллагын ачаалал нэмэгдэх, нас баралтын тоо аажмаар ихсэх судалгаа гарсан. Тухайлбал, нас баралтын тоо гуравдугаар сард 10, тавдугаар сард 15 хүрнэ. УОК-оос баярын өдрүүдэд хөл хорио тогтоохоор боллоо. Энэ хугацаанд “Нэг хаалга-нэг өрх”-ийн шинжилгээ хийнэ. Голомтын өргөтгөсөн тандалтын шинжилгээг хийхээр төлөвлөсөн байгаа. Тандалтын шинжилгээний гол зорилго коронавирусээр өвчилсөн иргэдийн 80 хувь нь хөнгөн, шинж тэмдэггүй байгаа учраас олон нийт дунд халдвар авснаа мэдэхгүй явж байх боломжтой. Үүнийг тандан илрүүлэх, голомтыг хумих зорилготой. Мөн гуравдугаар сард вакцин хийж эхлэх учраас бэлтгэл ажлыг хангах үүднээс шинжилгээ авна. Коронавирусээр өвчилсөн хүнд шинжилгээ хийхгүй учраас иргэдээс нэгдсэн журмаар шинжилгээ авч байгаа юм. Улаанбаатар хотод 115 голомт байгаагаас 30 нь идэвхтэй гэсэн судалгаа гарсан. Эхний ээлжинд идэвхтэй байгаа голомтод өргөтгөсөн байдлаар шинжилгээ хийнэ. Тодруулбал, идэвхтэй 30 голомтын 100 мянга гаруй өрхөөс хоёрдугаар сарын 11, 12, 13-нд шинжилгээ авна. “Нэг хаалга-нэг шинжилгээ”-нд байнгын 73, явуулын 137 цэг, шаардлагатай тохиолдолд ажиллуулах 100 багийг бэлдээд байгаа. Хөл хорионы үед зайлшгүй эмнэлгийн тусламж авах иргэдэд нийслэлийн Яаралтай түргэн тусламжийн төв үйлчилгээ үзүүлж, эмнэлгийн байгууллагууд руу хүргэнэ. Мөн төлөвлөгөөт мэс засал, хими эмчилгээ зэрэг шаардалагтай эмчилгээ хийлгэх иргэдийн автомашиныг постуудаар чөлөөтэй нэвтрүүлэх болно” гэв.