Өнгөрсөн оны арваннэгдүгээр сард Монгол Улсын Ерөнхийлөгч Х.Баттулга цар тахлын үед өрх бүрд 200 мянган төгрөгийг бэлнээр олгож, үлдсэн 800 мянган төгрөгийг зөвхөн үндэсний үйлдвэрлэгчээс архи, согтууруулах ундаа, тамхины төрлөөс бусад бараа, бүтээгдэхүүн худалдан авах эрх бүхий ваучер (эрхийн бичиг)-аар олгох хэрэгтэй гэсэн саналыг Ерөнхий сайдад хүргүүлсэн. Улмаар Засгийн газрын хуралдаанаар тогтоолын төсөл өргөн барьж, хэлэлцүүлсэн ч уг санал дэмжигдээгүй билээ.

 

Монгол Улсын Засгийн газрын дэмжээгүй Ерөнхийлөгчийн саналыг орон нутгаас дэмжиж эхэлсэн байна. Тодруулбал, Өмнөговь аймгийн МАН-ын дэд дарга С.Мөнхбаяр, "Хүннүгийн говь" ХХК-ийн Ерөнхий захирал, МАН-ын дэд дарга В.Мөнхбат, Даланзадгад сумын ИТХ-ын дарга Т.Мэндээ, аймгийн ИТХ-ын төлөөлөгч Ц.Будгэрэл тэргүүтэй Өмнөговь аймгийн Иргэдийн төлөөлөгчдийн хурал дахь Монгол ардын намын бүлгийн гишүүд Ерөнхийлөгчийн “Өрх бүрд нэг сая төгрөг олгох санаачилга”-ыг хэрэгжүүлэх шаардлагатай гэж үзсэн байна.

 

Үүнтэй холбоотой Өмнөговь аймгийн ИТХ-ын дарга Б.Бадраа болон Өмнөговь аймгийн Засаг дарга Р.Сэддорж нарт шаардлага хүргүүллээ. 

 

Аймгийн удирдлагын зүгээс шаардлагыг биечлэн хүлээн авахдаа Монгол Улсын Ерөнхийлөгчийн санаачилгыг цаг алдалгүй дэмжиж байгаа Өмнөговь аймгийн МАН-ын удирдлагуудад талархаад, энэхүү шаардлагыг Монгол Улсын Ерөнхий сайд Л.Оюун-Эрдэнэд хаяглан илгээхийг хүссэн байна.