Боловсрол, шинжлэх ухааны сайд Л.Энх-Амгалан өчигдөр буюу энэ сарын 4-нд их, дээд сургуулиудын захирлуудтай уулзжээ. Энэ уулзалтын үеэр тэрбээр “Сургуулийн газрыг зарсан захирлуудыг шууд хална. Төрийн их, дээд сургуулиудын 104 тэрбум төгрөг арилжааны банкуудад байршуулсан байна. Та нар ломбард биш. Мөнгө хүүлээд суугаад байж болохгүй. Төрийн мөнгө төрийнхөө саванд байх ёстой” гэв.

Үргэлжлүүлэн “Нэг сайд ирээд өмнөх сайдын шийдвэрийг өөрчилж, улс төрждөг, салбараа ялгаж харьцдаг байж таарахгүй. Шийдэх ёстой асуудлыг хууль хүлээлгүй тушаал гаргаад явна. Чанартай сургуулиудыг бодлогоор дэмжинэ. Төрийнх, хувийнх гэж ялгахгүй. Кембрижийн хөтөлбөрийг хуулдаг биш, Кембриж Монголын стандартыг хүлээн зөвшөөрхүйц боловсролыг бий болгох хэрэгтэй” гэв.