Өнөөдөр Хотын дарга асан Э.Бат-Үүл С.Зориг агсны хөшөөний дэргэд мэдээлэл хийлээ. Тэрбээр “Өнөөдрийг хүртэл аль болох хурдан шударга ёс тогтоолгохыг хүсэж, хэрэг хянан шийдвэрлэх ажиллагаанд саад болохгүй явж ирсэн. Шүүх хурлыг хурдан хийлгэх хүсэлтэй байна. Гэтэл хэрэг хянан шийдвэрлэх явцад намайг олон түмэнд буруутай мэтээр ойлгуулах ажиллагааг прокурорын зүгээс явуулж эхэллээ” гэв. Мөн "Ерөнхийлөгчийн сонгууль дөхөхөөр намайг элдэв хэрэгт холбогдуулан 30 жилийн турш гүтгэн гүжирдэж ирсэн. Айл ухдаг хулгайч, гадаадад олон хаустай, оффшорт хөрөнгөө нуусан, найз нөхдөө хөнөөдөг алуурчин гэх мэтээр холбогдуулаагүй хэрэг байдаггүй юм. Энэ байдал одоо ч үргэлжилж байна. Сүүлийн үед улам эрчимжсээр байна. Би монголчуудын эрх чөлөөний төлөө тэмцсэнээс өөрөөр гэм хийгээгүй. Авлига гэх муухай хэргээс хэзээд би хол явж ирсэн. Энэ бүх хууль бус ажиллагааг хэн зохион байгуулаад байгаа талаар шалгуулахаар УИХ-д хандах болно” гэв.

Үүний дараа тэрбээр сэтгүүлчдийн сонирхсон асуултад хариулт өгсөн юм.

-Ардчилсан намд үүсээд байгаа нөхцөл байдлын талаар та байр сууриа илэрхийлэхгүй юү. Ардчилсан нам байгаа үгүй нь мэдэгдэхээ болилоо?

-Ардчилсан нам байгаа. Байх байхдаа Үндэсний хэмжээний том нам хэвээрээ байгаа. Манай намд дотоод зөрчил гарсан. Энэ зөрчлөө яаралтай шийд гэсэн шүүхийн тогтоол гарсан. Бид яаралтай шүүхийн шийдвэрийг хэрэгжүүлэх ёстой. Өөрөөр хэлбэл, намын дараагийн даргыг яаралтай сонгох болчихоод байгаа юм. Энэ чиглэлээр өчигдөр Үндэсний бодлогын хороо хуралдсан. Хурал өнөөдөр үргэлжилнэ. Манай намын Улс төрийн зөвлөлөөс шийдвэр гаргаж хуралдуулсан.

Шүүхийн шийдвэрийг хэрэгжүүлчих юм бол дотоод зөрчил арилна. Манай нам дотор хоёр хэсэг хүмүүс хоорондоо үл ойлголцоод зөрчилдчихөөд байна. Үүнийг Ардчилсан нам байхгүй мэтээр олон нийтэд түгээж байна. Яг үнэндээ тэгж бодож байгаа хүмүүс бий, тийм болчихоосой гэж баярлаж байгаа ч хүмүүс бий. Ардчилсан нам Монголын ардчиллын баталгаа болоод байгаа гэдгийг хүн бүхэн мэдэж байгаа.

-Өнөөдөр Ардчилсан нам таны хэлсэн тэр байр сууриа хадгалж чадахгүй байгаа юм биш үү?

-Тийм учраас юуны өмнө Шүүхийн шийдвэрийг хурдан биелүүлж, улс төрийн идэвхтэй үйл ажиллагаа явуулна. Сөрөг хүчний орон зайгаа алдаад байгаа талаараа бид ярилцсан. МАН-ын хариуцлагагүй үйлдлүүд дээр манай намаас ямар нэгэн тэмцэл алга. Цаашид сөрөг хүчний үйл ажиллагааг идэвхитэй явуулна.

-Ерөнхийлөгчийн сонгуульд нэр дэвшигчийн талаар ярилцсан уу. Та нэр дэвших үү?

-Би удаа дараа хэлж байгаа. Би нийслэлийнхээ төлөө л явна. Нийслэлийн намын даргад өрсөлдөнө. Ирээдүйд боломжтой бол нийслэлийн Засаг даргад өрсөлдөнө. Намайг Ерөнхийлөгчийн сонгуульд үзэх гэж байна гээд гүжир гүтгэлэг яваад байна. Залуучууд нийгмээ авах цаг болсон. Манай намын залуучууд аваад явна гэдэгт итгэлтэй байна.

-Ерөнхийлөгч Х.Баттулга нэр дэвших эрхтэй юм уу. Та удаа дараа шүүмжилж байсан?

-Манай намаас Ерөнхийлөгчид нэр дэвшүүлэх хүнийг сунгаагаар шийднэ. Х.Баттулга байж болохгүй гэдэг тухай яриагүй. Х.Баттулга төрийн тэргүүн шиг байж чадахгүй байна гэж удаа дараа хэлдэг. Сунгаа явах гэж байгаа энэ үед хэн нэгний талд юм ярьмааргүй байна.

-Шүүхээс асуудалтай байгаа болохоороо та байр сууринаасаа буцаж байгаа юм уу?

-Би шударга шүүхээр шүүлгэх эрхээ эдлэхийг хүсэж байна. Шударга шүүхээр шүүгээд буруутай нь тогтоогдвол би  тэр шорон руу нь асуудалгүй явна.

-Хотын даргын ажлыг хэрхэн дүгнэж байна вэ. Таны үед эхлүүлж байсан төсөл, хөтөлбөр энэ засгийн үед үргэлжилж байгаа юу?

-Хотын дарга ажлаа аваад удаагүй байгаа болохоор ийм, тийм гэж дүгнэмээргүй байна. Их амаргүй ажил. Гэхдээ миний үед хийж байсан гэр хорооллын дахин төлөвлөлт зэрэг томоохон төслүүдийг МАН-ынхан бүгдийг нь зогсоочихсон.