УОК-оос мэдээлэл хийх үеэр сэтгүүлчдийн асуултад хариуллаа.

-Цагаан сараар хөл хорио тогтооно гэлээ. Үзэгчгүй, 128 бөх барилдана гэсэн шийдвэр хэвээрээ байгаа юу?

-Үндэсний бөхийг барилдааныг зохион байгуулах санал ирсэн. УОК үүнийг судалж үзсэн. Хөл хорионы үед бөхийн барилдаан зохион байгуулах шаардлагагүй гэж үзсэн. 

-Нийтийн тээвэр явуулахгүй гэлээ. Төрийн албан хаагчид яаж ажилдаа явах вэ?

-Бүх нийтийн бэлэн байдлын үед зайлшгүй ажиллах шаардлагатай аж ахуйн нэгжийн алба хаагчид ажлын үнэмлэх, бичиг баримтаар хөдөлгөөнд оролцоно. QR кодтой холбоотой асуудал гардаг. Давхар хяналт тавина.

-Хөдөө, орон нутагт хөл хорио тогтоох уу?

-Хөдөө, орон нутаг руу орох, гарах хөдөлгөөнийг хязгаарлана. Гэхдээ орон нутагт хатуу хөл хорио тогтоохгүй. Гол нь Цагаан сарыг тэмдэглэхгүй байх талаар чиглэл өгнө. 

-Хатуу хөл хорио тогтоохоос өмнө эрсдэлтэй юм биш үү?

-Эрүүл мэндийн яам, эрдэмтдийн зөвлөлөөс хоёрдугаар сарын 6-наас хөл хорио тогтоох санал гаргасан. Гэхдээ товлосон хугацаа биш байсан. Хоёрдугаар сард хөл хорио тогтоох ёстой. Ингэж байж халдварын голомтыг хумина гэсэн дүгнэлт гаргасан. Тиймээс Цагаан сарын үеэр хөл хорио тогтоохоор боллоо. Хөл хорио тогтоосон хугацаанд нийслэлийн иргэдийг шинжилгээнд хамруулна. Ингэхдээ  орон нутгаас PCR лабораторийг нийслэлд төвлөрүүлнэ. Тэгэхээр хоногт 35-40 мянган хүнийг шинжилгээнд хамруулах боломжтой.

Цагаан сараас өмнө халдвар тархах эрсдэл бий. Гэхдээ бид аль болох ажил цалгардуулахгүй байхад анхаарч  байна. Цаашид хэрхэх нь иргэдээс хамаарна. Нэгэнт Цагаан сар тэмдэглэхгүй гэж байгаа тохиолдолд бэлэг сэлт бэлдэх шаардлагагүй.