Ерөнхий сайд асан Ч.Сайханбилэг АНУ-аас өөрийн цахим хуудсаараа дамжуулан Ерөнхийлөгч Х.Баттулгад хандан мэдэгдэл хийлээ. 2017 онд эрх мэдэлд хүрснээс хойш Ерөнхийлөгч Халтмаагийн Баттулга нь Монголын Ардчиллыг нэг хүний засаглалын зүг уруудуулан доройтуулж, Авлигын эсрэг хуулийг зүй бусаар ашиглан, өөрийнхөө өрсөлдөгчдийг улс төрийн зорилгоор намнах ажиллагаа явуулж байна гэж “Амстердам энд Партнерс”-ийн Роберт Амстердам шинээр нийтлүүлсэн Цагаан номондоо онцолсон байна.

Ерөнхий сайд асан Ч.Сайханбилэг “Хуульд захирагдах ёстой шүүгч, прокурорыг томилохдоо Ерөнхийлөгч өөртөө захирагд гэж дарамтлаад, үгүй бол огцрох өргөдлөө огноогүй бичиж өгөхийг шаарддаг гэж Ерөнхий сайд нь ажлаа өгөхдөө мэдэгдсэнийг бодохоор үнэхээр сэтгэл өвдмөөр байна. Албан өрөөндөө шүүгч нарыг дуудаж, хэнд ямар зүйл анги, хэдэн жилийн ял өгөхийг даалгадаг Ерөнхийлөгчтэй гэдгийг Хууль зүйн сайд нь илчилснийг хараад үнэхээр уур хүрч байна.

"Чамайг төрийн нэр ашиглан баривчилж байгаад шоронд хатааж, тэнд нь ална" гэдэг заналхийллээ байж болох бүх сувгаар надад хүргэхээр оролдож байгаа Ерөнхийлөгчтэй гэж бодохоор дургүй, зэвүү зэрэг хүрмээр. Энэ бүхэн Солонгос савангийн дуурь, Холливудын кино зохиол биш.

Энэ бол бодит байдал, өнөөдрийн төрх. Холбогдох хэд хэдэн хууль байтугай, Үндсэн хууль зөрчсөн Ерөнхийлөгчийн энэ үйлдлүүд гуравхан хоногийн сошиалын сэдэв болоод мартагдаж байна.

 Ерөнхийлөгч "Монгол ялна" гэдэг боловч Монголоо ялагдуулаад дууслаа. Өөрөө 800 км төмөр зам тавьж байгаа гэдэг ч 267 км яваад хил дээр очих төмөр зам нь өнөөдөр ч дуусаагүй байна.

Хятадад нүүрс нийлүүлэх Австралийн орон зайг Орос нөхөж, харин Монгол ялагдлаа. Гуравдагч хөршийн хөрөнгө оруулагч дээр түшиглэсэн Оюутолгойн төслийг хөдөлгөсөн хүмүүсийг бүгдийг нь шоронд хийсэн. Өнөөдөр УИХ, Засгийн газрын урдуур, энэ асуудлын дундуур шургалж, энэ төслийн Ажлын хэсгийг хэзээ ч асуудал шийдүүлэхгүй, бүтэлгүй тод будгаар дүүргэх гэж байна. Цаад зорилго нь ердөө л гуравдагч орны хөрөнгө оруулалтыг хөөж гаргах, хоёр хөршид уг төслийг барьж өгөх, Монголыг дахин ялагдуулах юм. Түүний бүрэн эрхийн дөрвөн жилийн хугацаанд хүмүүсийн амьжиргааны түвшин улам буурч, эдийн засгийн өсөлт зогсож, хувийн хэвшлүүд үүд хаалгаа барилаа. Том компаниудыг өөртөө үнэнч хэсгээр нь хоёр хуваалаа. “МАНАН, 30 гэр бүл, оффшор” гэсэн хуйвалдааны баахан хуурмаг гомдлыг бий болголоо. Өөрөө жинхэнэ МАНАН-г байгуулж, оффшорын жинхэнэ эзнээр өөрөө тодорлоо” гэв.