Өчигдөр Монгол Улсын 32 дахь Ерөнхий сайдаар Л.Оюун-Эрдэнийг томиллоо. Түүний хувьд бүрэн эрхийнхээ хүрээнд Засгийн газрын танхимаа бүрдүүлнэ.

Шинэ Засгийн газарт хэнийг авч үлдэж, хэнийг гаднаас нэмэх талаар Ерөнхий сайд Л.Оюун-Эрдэнэ, МАН-ын дарга У.Хүрэлсүх, Ерөнхий нарийн бичгийн дарга Д.Амарбаясгалан нар ярилцсан гэх мэдээлэл бий. Үндсэн хуулийн дагуу УИХ-аас Засгийн газарт “давхар дээл”-тэй сайд дөрөв хүртэл байх юм. Тэгэхээр өмнөх Засгийн газраас УИХ-ын гишүүн Х.Нямбаатарыг Хууль зүй, дотоод хэргийн сайдаар авч үлдэхээр болжээ. Шадар сайд Я.Содбаатарын оронд УИХ-ын гишүүн Ж.Энхбаяр яригдаж байсан. Тэрбээр “Ямар нэгэн албан тушаалд очихгүй” гэдгээ мэдэгдсэн бол Улаанбаатар хотын дарга асан, УИХ-ын гишүүн С.Амарсайханыг хамгийн боломжит хувилбар гэж үзсэн байна.

Засгийн газрын хэрэг эрхлэх газрын даргаар МАН-ын генсек Д.Амарбаясгалангийн нэр яригдаж байсан ч Ерөнхийлөгчийн сонгууль болох гэж буй энэ үед “Намын ажлаа орхихгүй” гэсэн аж. Тиймээс Уул уурхай, хүнд үйлдвэрийн дэд сайд О.Батнайрамдалыг ЗГХЭГ-ын даргын албан тушаалд зүтгүүлж буй гэх мэдээлэл бий. Түүний хувьд Ерөнхий сайд Л.Оюун-Эрдэнийн ойрын хүн гэгддэг.

Харин Байгаль орчны сайд Д.Сарангэрэлийг явуулж, оронд нь УИХ-ын гишүүн М.Оюунчимэгийг тавих шуум яригдаж байна. Сангийн сайдын хувьд Ч.Хүрэлбаатарыг үлдээх үү эсвэл Төсвийн байнгын хорооны дарга Б.Жавхланг томилох уу гэх тохироонд хүрч чадахгүй байгаа аж.

Харин хуучин сайдуудаас Эрчим хүчний сайд Н.Тавинбэх, Зам, тээврийн хөгжлийн сайд Л.Халтар, Хүнс, хөдөө, аж ахуй, хөнгөн үйлдвэрийн сайд З.Мэндсайхан, Барилга хот байгуулалтын сайд Б.Мөнхбаатар, Батлан хамгаалахын сайд  Г.Сайханбаяр, Уул уурхай, хүнд үйлдвэрийн сайд Г.Ёндон нарыг улираан томилохоор ярилцаж байгаа аж.

Боловсрол, шинжлэх ухааны сайдаар тус яамны дэд сайд Г.Ганбаяр, Соёлын сайдаар Гадаад харилцааны дэд сайд асан Б.Батцэцэгийн нэр яригдаж байна. Харин Эрүүл мэндийн сайд Т.Мөнхсайхан албан тушаалдаа үлдэх эсэх нь тодорхойгүй байгаа юм.

УИХ-ын намрын чуулган энэ баасан гарагт хаах товтой байгаа. Тэгэхээр өнөөдөр, маргааш хоёр өдөрт багтааж Ерөнхий сайд Л.Оюун-Эрдэнэ сайд нарынхаа нэрийг оруулж ирэх хэрэгтэй болж байна.