УИХ-ын чуулганаар УИХ-ын гишүүн Л.Оюун-Эрдэнийг Ерөнхий сайдаар томилох асуудлыг хэлэлцэх үеэр УИХ-ын дэд дарга Т.Аюурсайхан Оюутолгойн асуудлаар байр сууриа илэрхийллээ. Тэрбээр “Оюутолгойн асуудлаар үгээ хэлж байгаа гишүүдийн тоо нэмэгдэж байгаад баяртай байна. Энэ мөсийг зүсэх амархан байгаагүй. 2006 онд УИХ-д орж ирээд бүтэн дөрвөн жил тэмцэж байж, Оюутолгойн ашиглалтад Монгол Улсын эрх ашгийг хангуулах тухай УИХ-ын тогтоолыг 10 жилийн дараа анх удаагаа батлуулсан. Энэ тогтоол тийм ч амар батлагдаагүй. Тухайн үед Б.Баттөмөр гишүүн Ажлын хэсгийг ахалсан. Тогтоолын текстийг би боловсруулж санаачилсан, нэрийг нь өгсөн. Аюулгүйн зөвлөл дээр маш их эсэргүүцэж, энэ тогтоолыг УИХ руу оруулж болохгүй, батлуулж болохгүй гэж их хааж, хорьж байсан. Л.Оюун-Эрдэнэ бид хоёр мөр зэрэгцэн сууж, эцсээ хүртэл тэмцсээр энэ тогтоолыг УИХ руу оруулж батлуулсан. Ингэснээр Засгийн газрын тогтоолыг өөрчлөх, Монгол Улсад ашигтай болгох үйл явцыг эхлүүлэх боломжийг бүрдүүлсэн. Оюутолгойн орд үндсэндээ ухаж дуусгаад манай улс нэг ч ашиг авахгүй, 22 тэрбум төгрөгийн өртэй үлдэх нь ээ. Ашигтай гэж хэлж байсан хүмүүс үнэнд гүйцэгдэж байгаа юм” гэлээ.

Мөн “Оюутолгойн гэрээ авлигын үндсэн дээр байгуулагдсан нь улам тодорхой болж байна. Авлигаа хувьцаагаар, катринг кэмпийн үйлчилгээний 64 тэрбумын ашгаар, шатахууны борлуулалтын 418 тэрбумын орлого олох боломжоор, үл хөдлөх хөрөнгө зэргээр авлига авсан нөхцөл үүссэн гэх үндэслэлтэй. Зарим нь шүүх дээр тогтоогдож байна. Тийм учраас энэ гэрээг Монгол Улсын эрх ашигт нийцүүлж чадахгүй юм бол цуцлах шаардлагатай. Улс, ард түмэн нь ийм хохирол амсаад байхад төрийн тэргүүнээр ажиллаж байсан хүн Оюутолгойгоос ашиг, орлого олоод явж байж таарахгүй. Нэг бус удаа шаардлага тавьж байгаа. Оюутолгойн ТУЗ-өөс Н.Багабанди гуайг нэн даруй гаргах шаардлагатай. Энэ олон жил ашиг хүртээд огт дуугүй явсан. Хэрэг эрхлэх газрын даргыг дарамтлаад үлдээд байна гэдэг мэдээллийг хэвлэлээс авч байсан. Одоо Улсын Ерөнхий сайдыг дарамталж чадахгүй байлгүй. Энэ тал дээр Парламентаас бүх талаараа хамтарч ажиллана” гэв.