УИХ-ын Төрийн байгуулалтын байнгын  хорооны хурлаар Ерөнхий сайдыг томилох асуудлыг хэлэлцэж дэмжсэн билээ. УИХ-ЫН ГИШҮҮН Ж.СҮХБААТАР “Үндсэн хуульд оруулсан нэмэлт өөрчлөлтийг өнгөрсөн жилээс дагаж мөрдөж эхэлсэн. Гэвч бид сүүлийн 30 жилд хуулийн хариуцлагыг хэн хүлээх вэ гэдэг дээр тодорхойгүй явж ирлээ. Үндсэн хуульд заасанчлан хуулийн биелэлтийг улс даяар хангаж, УИХ-ын өмнө хариуцлага хүлээх ганцхан албан тушаалтан нь Ерөнхий сайд. Энэ үүднээс Ерөнхий сайдын эрх мэдлийг бэхжүүлсэн. Цаашид УИХ хариуцлагыг Ерөнхий сайдаас нэхнэ. Ерөнхий сайд Үндсэн хуульд захирагдах ёстой. Энэ дээр таны тууштай хүсэл зориг ямар байна вэ” гэхэд МОНГОЛ УЛСЫН ЕРӨНХИЙ САЙДАД НЭР ДЭВШИГЧ Л.ОЮУН-ЭРДЭНЭ "Монгол Улсын Үндсэн хуулийг бүх иргэн, төрийн байгууллага дагаж мөрдөх үүрэгтэй. Үүний хүрээнд Засгийн газар ажиллана. Хууль тогтоох, гүйцэтгэх, шүүх эрх мэдэл бие биедээ хяналт тэнцвэртэй, хараат бус шүүхтэй байх ёстой. Энэ хяналт, тэнцвэрийг барьж ажиллана. Хувь хүн биш, хууль засагладаг засаг төртэй байх ёстой. Ийм итгэл үнэмшлээр ажиллана” гэв.