Өчигдөр Ерөнхий сайд У.Хүрэлсүх огцрохдоо энэ сарын 19-ний өдөр Сүхбаатарын талбайд болсон жагсаалыг Ерөнхийлөгч Х.Баттулга зохион байгуулсан хэмээн мэдэгдсэн билээ. Харин өнөөдөр Ерөнхийлөгч Х.Баттулгын хэвлэлийн төлөөлөгч О.Батханд мэдээлэл хийлээ. Тэрбээр “Ерөнхийлөгч намайг албан өрөөндөө дуудаж уулзаад жагсаал зохион байгуулсан хүмүүсийн дунд чиний нэр орсон байна гэсэн. Иргэн О.Батхандын хувьд тийм зүйл байхгүй гэдгээ хариуцлагатайгаар мэдэгдэж байна” гэв. Мөн “Тухайн үеийн жагсаалд ард түмэн сэтгэлийн дуудлагаараа, намын төлөөллүүд үзэл бодлоо илэрхийлэхээр цугларсан байсан. Үүнд Ерөнхийлөгч болоод Ерөнхийлөгчийн Тамгын газар ямар ч оролцоо байхгүйг батлан хэлж байна” гэлээ. Түүнчлэн “Би хуультай улсад амьдарч байгаа гэж итгэж байна. ТЕГ болон холбогдох хууль хүчний байгууллагад утасны ярианыхаа 20 өдрийн датаг боломж нь байгаа бол хоёр жилийн датаг сонсох эрхийг олгож байна” гэв.