УИХ-ын чуулганы нэгдсэн хуралдаанаар Засгийн газрыг огцруулах асуудлыг хэлэлцэж буй.

Энэ үеэр Ерөнхийлөгч Х.Баттулга үг хэлж байна. Тэрбээр "ҮАБЗ-ийн гишүүд урьд өмнөх ҮАБЗ-өөс илүү нэгдмэл санаа, бодол, нэгдсэн зорилготой ажиллаж байсан. Монгол Улсын төрийн тэргүүн миний бие ардчилал анх ирсэн цэгтээ эргэн ирлээ гэж бодож байна. Монгол Улс засаглалын хямралд орлоо. Үндсэн хуулийн нэмэлт, өөрчлөлтийн зөвлөлдөх ажлын хэсгийг миний бие өөрөө ахалсан. Монгол Улсын Засгийн газрын насжилт урт удаан, үр дүнтэй байх ёстой гэж үзэж Ерөнхий сайдын эрх мэдлийг нэмэгдүүлсэн. Иргэдийн сайн дураараа зохион байгуулсан жагсаалыг хэн нэгэн зохион байгуулсан мэт илт хуурамч мэдээлэл гаргалаа. Үүнд туйлын харамсалтай байна. 2020 оны УИХ-ын сонгуулийн үр дүн бол У.Хүрэлсүхийн хувь хүний манлайлал, нэр хүндэд итгэсэн иргэдийн итгэл байв. Гэтэл эдийн засаг, цар тахлын хүнд үед иргэдийн сонголтыг хөсөрдүүллээ. Ийм эрх энэ хүнд байхгүй. Би Монгол Улсын Ерөнхий сайд У.Хүрэлсүхийг үүрэгт ажлаасаа чөлөөлөгдөхийг огт дэмжихгүй байна" гэлээ.