Ерөнхийлөгч Х.Баттулга УИХ-ын чуулганд оролцож үг хэлж байна. Тэрбээр “Монгол Улсын түүхэнд тэмдэглэгдэх хар өдөр тохиож байна. Ерөнхий сайд У.Хүрэлсүх тааж тааварлахын аргагүй учир битүүлэг шалтгаанаар огцрохоор боллоо. Харамсалтай байна. Ерөнхий сайд Монголын ард түмний итгэл, найдварыг хөсөрдүүлэх ийм үйлдэл яагаад хийх болов. Үндэсний эв нэгдлийг бусниулах, Монгол Улсын Ерөнхийлөгчийг илэрхий гүтгэх үг, үйлдлийг яагаад хийх болов гэдэгт эргэлзэхийн дээдээр эргэлзэж, гайхахын дээдээр гайхаж байна. Монголынхоо төлөө хоёргүй сэтгэлээр зүтгэсэн Ерөнхий сайдаас маань ийм үг, үйлдэл гарна чинээ би санасангүй. Нэг зүйл маш тодорхой байна. Тусгаар Монгол Улсыг эзэгнэн дарлах гэсэн тодорхой бүлэглэл, бүр тодорхой хэлэх юм бол УИХ-ын гишүүн, Ерөнхий сайд байсан Сүхбаатарын Батболдын удирдсан бүлэглэл төрийн эргэлт хийж байна. Өнөөдөр Оюутолгойн төслийн үйл ажиллагааг дотоодын төдийгүй гадаадын хууль хяналтын байгууллага шалгаж эхэлсэн бөгөөд гол холбогдогч нь Сү.Батболд гэдгийг хаа хаанаа тогтоогоод эхэлсэн. Ийм учраас тэр Монголын төрийг хямрааж, Монголын ард түмний сонголтыг нухчин дарах ажиллагааг удирдан зохион байгуулж эхэллээ” гэв.