УИХ-ын чуулганы хуралдаанаар Засгийн газрыг огцруулах асуудлыг хэлэлцэж байна. Хэлэлцэх асуудалтай холбоотой  УИХ-ын гишүүн С.Бямбацогт горимын санал гаргасан юм.

Тэрбээр "Ерөнхий сайд өөрийн саналаараа огцорч байгаад харамсаж байна. Анх удаа Ерөнхий сайд өөрийн саналаар огцрох гэж байна. Дөнгөж төрсөн эх, хүүхэдтэй зүй бусаар харьцсан үйлдэлд харамсаж байна. Байж боломгүй бүдүүлэг алдаа гарсан. Гэхдээ төрийн албан хаагчийн алдаанаас болж хоёр сайд, Засгийн газар огцрох асуудал үүсэж байгаа нь Монгол төрийн дархлаанд сөргөөр нөлөөлөх вий. 200 мянган төрийн албан хаагчийн нэгийнх нь алдаанаас болж Засгийн газар огцордог жишиг тогтох вий. 

Үндсэн хуулиар Засгийн газар, Ерөнхий сайдыг огцруулах хууль УИХ-ын гишүүд өргөн барьж огцруулдаг. Эсвэл Ерөнхий сайд нь өөрийн хүсэлтээр чөлөөлөгдөнө гэж хуульчилсан.Тиймээс Дэгийн тухай хуулийн 3.2-д зааснаар "Тусгайлан зохицуулаагүй асуудлын хэлэлцэх дэгийг УИХ өөрөө тогтооно" гэж заасны дагуу горимын санал гаргаж байна" гэсэн юм.