УИХ-ын чуулганы нэгдсэн хуралдаанаар Ерөнхийлөгчийн сонгуулийг зургаадугаар сарын 9-нд зохион байгуулахаар боллоо. Үргэлжлүүлэн Монгол Улсын Ерөнхийлөгчийн 2021 оны ээлжит сонгуульд техник хэрэгсэл хэрэглэх тухай” УИХ-ын тогтоолын төслийг хэлэлцэж баталлаа. Энэ удаагийн сонгуульд “New Image Cast” санал тоолох төхөөрөмж хэрэглэх саналыг оруулж ирсэн. Санал тоолох төхөөрөмжийн 30-40 хувь нь АНУ-ын сонгуульд хэрэглэдэг, 40-50 хувь нь АНУ-ын компанийнх гэв.

Энэ үеэр УИХ-ЫН ГИШҮҮН Н.АЛТАНХУЯГ “Энэ ямар төхөөрөмж вэ. Хар машиныг шатааж байсан Ж.Мөнхбат гишүүн одоо машиндаа учиргүй хайртай болчихсон байна. Санал тоолох машиндаа итгэх итгэлтэй болмоор байна” гэхэд

УИХ-ЫН ГИШҮҮН Ж.МӨНХБАТ “Хар машин шатааж байсан гээд Н.Алтанхуяг гишүүн яриад байна. Энэ үнэн. Н.Алтанхуяг гэдэг хүн Ардчилсан намын дарга байхдаа 2012 онд энэ хар машинаар ялж Ерөнхий сайд болж байсан. Хар машины хяналтын тооллогыг тухайн тойрог дээр хоёр хэсгийн хороог сонгож хяналтын гар тооллого хийдэг байсан. 2012 онд Архангай аймагт хоёр газар хийгдэх хяналтын тооллого санал хураалт болохоос өмнө нь тодорчихсон байсан. Нэгэнт байршил нь тогтчихсон байгаа газар луйвар болно. Тийм учраас би хар машиныг шатааж тэмцэл хийж байсан. Тэрний үр дүнгээр 2016, 2020 онд 50 хүртэл хувьд нь гар тооллого хийхээр болсон. Өнөөдрийн энэ хуулийн заалтаар 100 хувь хүртэл гар тооллогоор хяналт хийхээр орж ирж байна. Тухай үеийн миний тэмцэл үр дүнгээ өгч байна” гэсэн тайлбар хийлээ.