Ардчилсан намынхан хамтарсан Засгийн газарт орох гэж нам дотроо санал зөрөөд, дахиад тамга, тэмдгээ салгадгийн даваан дээр арай гэж шийдэлд хүрсэн гэдэг.

     Намын дарга Л.Гантөмөр сонгуулийн өмнө л хамтарсан Засгийн газарт орох тохироогоо хийчихсэн байсан ч дотроо зодоонтой тэд намын даргаа огцруулах асуудлыг хүртэл хөндөж, албан тушаалын тохироо хийснээр, Л.Гантөмөр намын даргаар улирч, Ардын намтай  хамтрахаар болсон гэдгийг Саарал ордноор жиг жуг гэх болсон.

    Тэр байтугай намын гишүүд нь Засгийн газарт багтах гэж “уйлж”, дуулсаар сайдын суудалд хүрсэн гэх нь ч бий. Мэдээж, намд олгогдсон квотод цөөн хэдэн нь давхар дээлтэй сайдаар сууж, гомдогсод үлдээхгүйн тулд дэд сайдын томилгоог фракцын төлөөллүүдээр бүрдүүлнэ гэх тохироотой Ардчилсан нам хамтарсан Засгийн газарт орохоор болсон байна. Ингээд  Ардчилсан нам  хамтарсан Засгийн газарт найман сайдын суудал авсан бөгөөд дахин найман дэд сайд Засгийн газарт оруулна гэх тооцоололтой байв.

        Гэвч Засгийн газрын бүтэц бүрэлдэхүүнийг тодорхойлох үеэр Ерөнхий сайд болон Ардын намынхан дэд сайдын орон тоогүй бүтцээ зурахаар шийдсэн нь Л.Гантөмөрийн төлөвлөгөөг нураасан бололтой. Тиймээс АН-ын дарга дэд сайдын орон тоог хэвээр үлдээх хүсэлтээ Ерөнхий сайдад илэрхийлснээр Засгийн газар сайд нарын тоог цөөлөх эсэх асуудлаа өнөөдрийг хүртэл шийдэж чадаагүй байна.

       Л.Оюун-Эрдэнэ Засгийн газрын бүтцээ данхайлгалгүйгээр авч явах бдолтой байсан ч Ардчилсан намын дарга Л.Гантөмөр төлөвлөгөөгөө нураахгүй тулд дэд сайдын орон тоог байх ёстой хувилбар гээд шалгаасаар байгаа сурагтай.

     Угтаа бол Л.Гантөмөр АН-д амь бөхтэй тэсэж үлдэхийн тулд дараагийн алхмаа хийж, дэд сайд гэх албан тушаалаар намынхаа дүү нарыг өөрийнхөө талд оруулж, баг бүрдүүлэх санаатай суугаа. Ингэж, аажим аажмаар барьцаа ахиулсаар Л.Гантөмөр Ардчилсан намыг Ардын намд дагаар оруулах ажлынхаа ард гарч, араас нь угсраа мэхтэйгээр өөрийгөө хамгаалуулах багана босгож байна гэж хардах хүн ч олон байна, үнэн хэрэгтээ.

       Уг нь ард түмэн Ардчилсан намыг хүчтэй сөрөг хүчин байгаасай гэж мөн ч их хүлээсэн, хүссэн. Өөрөөр хэлбэл, өнгөрсөн найман жил нэг нам дангаараа засаглаж, хуулийн төслүүдээ хэрхэн машинддаг болохын горыг хангалттай амссан юм. Харамсалтай нь, Арчилсан намынхан ард түмний хүлээлтэд хүрэхгүйгээр барахгүй, сайдын суудалд суух гэж том, жижиггүй гомдоллох болжээ.

       Эв нэгдлийн Засгийн газрыг байгуулж, том төслүүдээ хөдөлгөнө гэх хөнгөхөн хэдэн үгээр ард түмнийг аргалах гэж хэрэндээ хичээж байгаа нь илт байна. Гэтэл начир дээрээ дахиад л сөрөг хүчингүй, эрх мэдэлд барьцаалагдсан хүчгүй төлөөлөл байсаар дөрвөн жилийг тарамдаж дуусах нь гарцаагүй боллоо.

          Ардчилсан намд дотоод ардчилал, намын төлөвшил гэж огт байхгүй болсноо алхам тутамдаа зарлаж байна.  Өнөөгийн Ардчилсан намаас манлайлал, улс төрийн зангараг, намын төлөвшил гэж горьдоод ч хэрэггүй юм байна. Эндээс ёроолдоо тултал унасан Ардчилсан нам улс төрд хэр удаан тэсэх вэ гэдэг асуулт ургаж гарч байна.

            Уг нь цагтаа Монголын аль толгойтой, мэдлэгтэй, ур чадвартай боловсон хүчнүүд Ардчилсан намд элсэн орж, сөрөг хүчний үүрэг гүйцэтгэхдээ Ардын намыг айлгадаг, хүчтэй улстөрчдөөр хүрээгээ тэлж байсан. УИХ-д олонх болж, хоёр удаа Засгийн газар байгуулахдаа бүтээн байгуулалтын ажлуудыг зоригтой эхлүүлж, эдийн засагт хөгжлийн шинэ гарц нээж байлаа. Түүхий эдийн үнэ дэлхийн зах зээл дээр нам унаж, экспортын орлого тасалдах хэмжээнд хүрэхэд гадны хөрөнгө оруулалтыг татаж, бонд гаргаж, эдийн засгаа сэргээж болдог гэдгийг үлгэрлэн харуулсан улс төрийн чамбай нүүдэлчид байв. Харамсалтай нь, хэдхэн хүний ашиг сонирхлоос болж, Ардчилсан нам ард түмний дунд нэр  хүндээ алдаж, Ардын намын улс төрийн тоглолтын дундаас өндийх тэнхэлгүй өөхөнд боосон чулуу шиг болцгоов. Тэд дотроо хэдэн фракц болж хуваагдаж нэгнээ л үзэн ядаж, харлуулахаас биш, шавар дундаас гаръя гэх тэмцэл хийж байгаа нь огт харагдахгүй байна.

      Үндсэндээ Ардчилсан нам үнэт зүйлээ алдаж, энэ сонгуулийн ялагдлаар “амь” тасрах дээрээ тулахдаа хүрэв бололтой.

Уг нь намынхаа хувь заяаг атгаж яваа Л.Гантөмөр начир дээрээ өөр зорилготой байв. Намынхандаа дэд сайдын суудал “амлаж” Засгийн газарт  багтсан тэрбээр сайдгүй болгох нь гээд сандарч яваа сурагтай.