УИХ-ын гишүүн С.Ганбаатар мэдээлэл хийлээ. Тэрбээр “Оюутолгойн гэрээг хийгээд Монголын ард түмэнд ажлын байр, орлого бий болгоно гэж бодсон ч эсэргээрээ Монгол Улс 22 тэрбум ам.долларын өртэй үлдэж, 2051 он хүртэл ямар ч ногдол ашиг авахгүй гэдгийг "Рио Тинто"-гоос албан ёсоор мэдэгдсэн байна. Монголчууд бид ингээд байгаад л байх уу. Монголын Засгийн газар хоёр жил орчим УИХ-аас өгсөн үүрэг даалгаврын дагуу ажилласан нэртэй хэрнээ юу ч хийгээгүй. Ерөнхий сайд У.Хүрэлсүх Ажлын хэсгийн ахлагч Л.Оюун-Эрдэнэ нар маш хариуцлагагүй ажилласан. Энэ талаар “УИХ-д тайлан мэдээлэл хийнэ үү” гэдэг албан бичгийг өнгөрсөн долоо хоногт УИХ-ын даргад өргөн барилаа. Тиймээс энэ долоо хоногт яаралтай горимоор Оюутолгойн хэлэлцээрийг монголчуудад ашигтай байлгах талаар хийж байгаа ажлаа Засгийн газрын Ажлын хэсэг УИХ-д мэдээлэл хийгээч ээ гэдэг шаардлага тавьж байна” гэлээ.

Мөн тэрбээр өнөөдрийн байдлаар Монголын 1.2 сая тонн зэс, 75.8 тонн алт, 231 тонн мөнгө Монгол орны хил даваад гарчихсан байна. Энэ нь одоогийн үнэ цэнээр нийтдээ 14 тэрбум ам.долларын баялаг манай улсаад гарчихаад байгааг хэллээ. Түүнчлэн "Монголын Засгийн газрын сайд нар Оюутолгойн гэрээг байгуулахдаа авлигал авсан, үндэслэлгүй баяжсан гэсэн мэдээллээр Америк, Англи, Сингапур, Хонгконг зэрэг дөрвөн улсын шүүх дээр шийдвэрүүд гарчихсан байгаа. Гэтэл Монголын Засгийн газар ямар ч алхам хийхгүй байна" гэв.