Намрын чуулганыг хаах гэж буйтай холбогдуулан УИХ энэ долоо хоногт нилээд хэдэн хуулийн төсөл хэлэлцэхээр төлөвлөжээ. Учир нь УИХ-ын чуулганы нэгдсэн хуралдаан хуваарийн дагуу пүрэв, баасан гарагт хуралддаг бол энэ долоо хоногт лхагва гарагаас эхлэн хуралдахаар төлөвлөсөн байна. Тухайлбал, Хөдөлмөрийн тухай хуулийн шинэчилсэн найруулга, Банкны тухай хуульд оруулах нэмэлт өөрчлөлт, Музейн тухай хууль, Хоршооны тухай хуулийн шинэчилсэн найруулга, Хүний эрх хамгаалагчийн эрх зүйн байдлын тухай хуулийн төслийн анхны хэлэлцүүлгийг хийх юм байна.

Мөн Патентын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүд, УИХ-ын гишүүн Ц.Цэрэнпунцаг нарын гишүүдийн өргөн барьсан Нөхөн олговор олгох тухай хуулийн төсөл зэргийг хэлэлцэх аж.