УИХ-аар хэлэлцэгдэж буй Шүүхийн тухай хуулийн талаар УИХ-ын гишүүн Ш.Адьшаа мэдээлэл хийлээ. Тэрбээр “Монгол Улсын Үндсэн хуулиар олгосон хүний эрх ноцтой зөрчигдөж, шударга шүүхээр шүүгдэх, Улсын дээд шүүхэд давж заалдах эрх ноцтой зөрчигдөж байна. Авлигал, албан тушаалын гэмт хэрэг, оффшор бүсэд мөнгө байршуулах, мөнгө угаах, уул уурхай, байгалийн баялагийг хууль бусаар ашиглах, үндэслэлгүйгээр хөрөнгөжих гэх мэт ноцтой хэргийг Дээд шүүхийн хяналтгүйгээр шийдвэрлэх боломжийг энэ хуулиар нээлттэй болгож байна. Эрх баригчид өөрсдийнхөө гэмт хэргийг хаацайлах хуулийн төсөл болгож байна” гэлээ.

Мөн уг хуулийн төслөөр шүүх засаглал УИХ-ын хараат болохоор байгааг шүүмжлэв. Энэ хуулийн төслийн 80 хувийг өөрчилж, зарим саналыг Ажлын хэсэг дээр дэмжигдээгүй байхад дэмжиж оруулж ирсэн гэв. Шүүхийн бие даасан, хараат бус байдлыг сайжруулах талаар ахиц гарсан юм харагдахгүй байна. Шүүхийг зайлшгүй шинэчлэх ёстой. Энэ бол нийгмийн захиалга болсон. Гэтэл эрх баригч намынхан уг хуулийн төслийн үндсэн үзэл баримтлалыг алдагдуулж байгааг хэллээ.