“Эдийн засгийн бодлого, өрсөлдөх чадварын судалгааны төв”-өөс “Аймгуудын өрсөлдөх чадварын тайлан-2023”-ыг танилцууллаа. Аймгуудын өрсөлдөх чадварын судалгааг 181 үзүүлэлтээр шалгадаг байна. Үүнээс 71-ийг статистик үзүүлэлтээр, 76-г санал асуулгаар явуулжээ.

    Энэ талаар судлаач Б.Мөнгөнжигүүр "2023 оны өрсөлдөх чадварын үнэлгээгээр Орхон аймаг тэргүүлсэн. Сүүлийн хоёр жилийн үр дүнгээр Дорноговь аймаг тэргүүлсэн бол хоёрдугаарт эрэмбэлэгдсэн. Орхон аймгийн хувьд засаглалын үр ашиг болон дэд бүтцийн үр ашиг гэсэн хоёр үзүүлэлтээрээ нэгдүгээрт эрэмбэлэгдсэн. Энэ нь Ерөнхий өрсөлдөх чадвараараа нэгдүгээрт эрэмбэлэгдэхэд голлох нөлөө үзүүлсэн. Дархан-Уул, Говьсүмбэр, Өмнөговь аймгууд эрэмбийн өөрчлөлтгүй буюу 3,4,5 дугаар жагсаж байна. Дархан-Уул аймгийн хувьд эрэмбэ өөрчлөгдөөгүй ч өрсөлдөх чадвар нь есөн оноогоор өссөн байна. Үүнд бизнесийн эрх зүй, институтын тогтолцоо, боловсрол соёлын харилцаа нөлөөлсөн. Өмнөговь аймгийн өрсөлдөх чадварын оноо 3.5-аар буурсан. Дундговь, Завхан, Говь-Алтай аймгууд хамгийн хойгуур эрэмбэлэгдсэн. Энэ гурван аймаг бизнесийн үр ашиг сул байна" гэлээ.