Өнгөрсөн 2020 оны арванхоёрдугаар сард Ардчилсан намынхан 10 дугаар Их хурлаа хуралдуулсан билээ. Гэвч намын хуучин дарга С.Эрдэнэ уг хурлыг хүчингүй хэмээн мэдэгдэж, намын даргын үүрэг гүйцэтгэгч С.Тувааны эзэмшиж байгаа тамгыг хүчингүй болгуулахаар УБЕГ-т хандсан байдаг. Харин үүнийг намын даргын үүрэг гүйцэтгэгч С.Туваан үгүйсгэж, намын ажил хэвийн үргэлжилж байгаа гэсэн бол нөгөө талаас “Маргаан нэг талдаа гарсан. С.Эрдэнэ намын дарга хэвээрээ” хэмээн мэдэгдэж байв.

Тэгвэл Ардчилсан намынхан ирэх дөрөвдүгээр сард АН-ын даргын сунгаагаа хийхээр бэлтгэл ажилдаа ороод байгаа аж. Одоогоор арав гаруй хүн намын даргын сунгаанд өрсөлдөхөөр бүртгүүлээд байгаа гэх мэдээлэл бий. Үүнээс албан ёсоор мэдэгдэж буй нь УИХ-ын гишүүн асан Ц.Оюунгэрэл. Тэрбээр “Хамгийн түрүүнд материалаа бүрдүүлж өгөв. Одоогоор нэр дэвшээд байгаа зургаа, долоон эрчүүдтэй ганцаараа өрсөлдөх эмэгтэй нь болж байх шиг байна. Ер нь манай намын түүхэнд эмэгтэй хүн намын даргад өрсөлдөж буй анхны тохиолдол энэ” хэмээн мэдэгджээ. Мөн тэрбээр Ерөнхийлөгчийн сонгуульд өрсөлдөхөө илэрхийлээд байгаа билээ.