Маргаашнаас бүх нийтийн бэлэн байдлын зэрэглэлийг бууруулж, зарим үйлчилгээний байгууллагуудын үйл ажиллагааг нээж буй. Үүнтэй холбогдуулан Эрүүл мэндийн сайд Т.Мөнхсайхан мэдээлэл хийлээ.

Тэрбээр 1.2 сая гаруй хүнд шинжилгээ хийж 1300 гаруй хүнийг эмнэлэгт хэвтүүлэн эмчилсэн. Халдвар голомтлон гарсан зургаан аймагт мэргэжлийн арван багийг тоног төхөөрөмжөөр хангаж ажиллуулсан гэлээ. Үүний үр дүнд халдвар гарсан аймгууд халдваргүй эрүүл бүс болоход ойрхон байна гэв.

Харин Улаанбаатар хотод Баянзүрх дүүргийн нэгдсэн эмнэлэгийн халдварын голомт өргөн хүрээг хамарсан. Хөл хорионы дэглэмийг яагаад сулруулж байна вэ гэж иргэд асууж байна. Зөвхөн өдөрт илэрч байгаа тохиолдлын тооноос хамаарч хөл хориог сунгахгүй. Илэрч байгаа тохиолдлууд дөрвөн голомтоос үүсэн гарч байна. Нийт тохиолдлын 54 хувь нь Баянзүрх дүүргээс гарсан. Хоёр дахь том голомт нь "Ачтан" эмнэлэг байна.  Үүнээс үүдэлтэй Баянгол дүүргийн тав, зургадугаар хороонд тэг зогсолт хийж иргэдийг шинжилгээнд хамруулж байна. Өнгөрсөн хоёр хоногт илэрсэн халдварууд бидний хяналтад байгаа. Гурав дахь голомт бол "Тэнүүн-Огоо" компани, дөрөв дэх голомт нь "Мөнххада" компани. Дээрх голомтуудыг хяналтандаа авчихсан байгаа гэлээ. 

Мөн ковидын үеийн шинэ амьдралын хэв маягт дасан зохицох ёстой гэдгийг санууллаа. Тэрбээр “Манай улсын хувьд Дархлаажуулалтын хуультай. Хуулиараа нийт хүн амаа дархлаажуулна. Манай улсын хувьд вакциныг түргэвчилсэн байдлаар бүртгэх журмаа баталсан. Тиймээс ДЭМБ-д бүртгэгдээд байгаа гурван вакциныг Монгол Улсын эмийн бүртгэлд бүртгээд байна. Ингэснээр иргэдээ түргэн вакцинжуулах боломж бүрдэж байна. Эхний ээлжийн вакцин орж ирэхэд бид бэлтгэл ажил, нөхцөлийг бүрдүүлчихээд байгаа юм.

Тиймээс эхний ээлжинд эмч, ажилчдаа вакцинд хамруулна. Дараа нь ахмад настнуудаа гээд шат дараатай хамруулаад явна. Мөн иргэдийг вакцины дэвтэртэй болгох ажлыг хийнэ” гэлээ. Маргаашнаас хөл хорио суларч байгаа хэдий ч халдвар тархах эрсдэл өндөр байгаа гэдгийг санаж халдвар хамгааллын дэглэмээ сайтар мөрдөж ажиллахыг санууллаа.