Нийслэлийн онцгой комиссоос хөл хорио сулруулах асуудлаар мэдээлэл хийж байна. Ирэх даваа гарагийн 06:00 цагаас хөл хориог сулруулахаар болсон.  Нийслэлийн Засаг даргын орлогч Ж.Сандагсүрэн "Хөл хорио сулруулах үеэр автомашин дугаарын хязгаарлалтаар явна. Нийслэлээс орох, гарах хөдөлгөөний хязгаарлалт хэвээр үргэлжилнэ" гэв. Энэ үеэр сэтгүүлчдийн сонирхсон асуултад хариулт өглөө.

-Хувцас, бараа бүтээгдэхүүний үйл ажиллагааг арваннэгдүгээр сараас хойш нээгээгүй. Иргэд түрээсийн мөнгө өгөх, орлогогүй болох зэрэг асуудал их байна. Худалдаа үйлчилгээг нээх боломжгүй юү?

-Бараа бүтээгдэхүүний худалдаа хүнсний худалдаанаас бага бөөгнөрөл үүсгэдэг мэт харагддаг. Гэтэл үүний цаана томоохон худалдаа үйлчилгээний төвүүд байна. Нийслэлийн нөхцөл байдал хөнгөн түвшинд хүрсэн гэж хэлж болохгүй. Тухайлбал, Баянгол дүүрэгт тэг зогсолт хийсэн байгаа.

-Олон иргэн хөдөө орон нутаг руу гарч чадахгүй байгаа юм байна. Хотоос гарах хөдөлгөөнийг хэзээ нээх вэ?

-Орон нутгийн иргэдийг буцаах эсэх талаар УОК-оос шийдвэр гаргана. Орон нутаг бол өвчлөлгүй бүс болсон. Тиймээс эрсдэл үүсгэхгүй байхад анхаарах хэрэгтэй.